Kazu Eis Sekjer KSTL “Tribunal Kondena Pena Suspensaun”

.

Jornal Nacional Diario - Kinta-Feira, 06 Junho 2013 

Tribunal Distrital Dili (TDD), Kuarta (5/6), hasai ona desizaun ikus ba kazu eis Sekretariu jeral Konsellu Sindikatu Trabaladores Timor Leste (KSTL), Rigoberto Monteiro, ne’ebe deskonfia uza osan ho montante US$30.000 ne’ebe Sekretariu Estadu Politika Formasaun Empregu (SEPFOPE) haruka sala ba iha konta bankaria KSTL nian. 

Liu husi leitura akordaun ne’ebe le sai husi juis Prezidenti Jose Maria katak, hare ba deklarasaun husi testamunha hotu no mos arguidu rasik katak, maske arguidu hatene osan ne’e SEPFOPE haruka sala ba KSTL nia konta bancaria, maibe arguidu kontinua haruka nia rezoreira iha KSTL hodi halo levantamentu hodi uza ba arguidu nia interese rasik, la uza ba aktividade KSTL nian. 

Ho nune’e mak Tribunal hare katak, faktus sira ne’e provadu duni, nune’e Tribunal konsidera arguidu komete duni krime abuzu de poder, tanba ne’e, Tribunal deside fo pena prizaun tinan rua, maibe suspende ba tinan 3, no Tribunal mos fo prazu ba fulan 6 ba arguidu atu selu fali indeminizasaun ba SEPFOPE ho montante U$3.000 ne’ebe mak nia uza ba ninia interese privadu, tanba tuir Tribunal, SEPFOPE hetan prezudikasaun atu uza osan ne’e, arguidu foti tiha hodi uza fali ba nia interese privadu, i arguidu mos tenki seluU$ 20 ba kustu huridiku.

.