Identifika Grupu Mafia Iha Dili: “Ka’er Ona Lindalva Ho Lita”

.

Jornal Timor Post - Tersa-Feira, 11 Junho 2013 

Afinal iha Dili mos iha Grupu Mafia, grupu ne’e konsege soe ona lasu ba ema barak ne’ebe osan iha kauze dollar rihun atus sanolu (10), Domingu (09/6), vitima rasik koordena ho komunidade sira kaer ona Lita Luisa Estrela Soares de Oliveira no Lindaalva Alves. 

 “Ami kaer Senora Linda iha Otel Sebastiao, no ida seluk ba intrega an ba Polisia,” informa Jacob Ximenes nu’udar emprejariu ida ne’ebe monu mos ba mafia grupu ne’e nian. 

 Jacob haktuir, kronolojia grupu ne’e nia aktividade, fou-foun, feto nain rua ne’e halo finji (sengaja) kontratu tiha nia primu ida, ho naran Mariano da Costa ba servisu hamutuk ho sira hodi haruka iha Mariano ba Indonezia sein objetivu klaru. 

“Sira haruka Mariano ba Indonezia, depois atu fila sira la preokua ona, parese tanba sira uza Mariano atu hau bele fiar sira, to’o ikus hau mak tenki haruka fali osan ba Mariano fila mai Dili,” haktuir Jacob. Wainhira Mariano iha hela Indonezia, Lindalva ho Lita, ba aluga Jacob nia kareta vaskolante rua ho numeru matrikula ida-idak, 55.650 TL no 56.108 TL, durante semana rua. 

 “Kareta ida sira foti iha dia 9 Maiu, no ida seluk sira mai foti iha dia 10 maiu, tuir lolos sira tenki intrega ona iha dia 23 maiu, maibe to’o agora hau nia kareta seiduak iha hau nia liman,” hatutan Jacob, segunda (10/6). Jacob dehan Lita ho Lindalva, iha semana dahuluk selu duni osan U$2500.00 ba nia tuir kriteriu aluga kareta rua ne’e ida-idak kada loron U$80.00. 

Tuir kontratu ne’ebe iha, Jacob haktuir, objetivu Lita ho Lindalva aluga kareta rua ne’e atu ba servisu projeitu iha Liquica, maibe Javcob hateten, afinal, liu tiha semana ida nia rasik ba kontrolu kondisaun kareta laiha fatin, husi ne’e, Jacob kontinua buka tuir durante semana ida ho balun, no Domingo (09/6) mak ba hetan fali kareta iha Quintal boot no ida seluk iha Tuana-laran. 

“Sira (lita ho Lindalva) ba gadai (penor) tiha kareta rua ne’e, kareta ida sira penor 17 ribu (U$17.000) no ida seluk 13 ribu (U$13.000),” dehan Jacob. 

Wainhira to’o iha Polisia, Lita ho Lindalva rekonese sira nia atividade ne’e, maibe Jacob hateten ba Timor Post, nia parte triste tanba polisia husi livre tiha feto nain rua ne’e. 

“Afinal ema barak mak sai vitima ba grupu mafia ida ne’e, wainhira Polisia investiga, sira kuaze lori ema nia kareta hamutuk 52 ba gadae tun sa’e de’it, sira nia hela fatin la loos, tanba sira sae taxi bat un iha fatin ida hodi sae fali taxi seluk,” haktuir Jacob. 

 Tanba ne’e, Jacob husu ba orgaun judisiariu no Polisia rasik tenki konsidera kestaun ne’e seriu hodi halo investigasaun to’o hun. Kona-ba Jacob nia kareta ne’ebe hetan ona, Jacob rasik entrega ona prosesu ne’e ba polisia hodi halo atuasaun. 

To’o Notisia ne’e publika, Timor Post Via telefone tenta konfirma ho Polisia investigasaun kriminal razaun husik Lita ho Lindalva, maibe laiha resposta tanba laiha autorizasaun komandante komponente. 

Iha oportunidade ne’e, Jacob husu ba publiku atu kuidadu ho gurpu mafia ne’ebe oras ne’e hahu mosu iha sidade Dili.

.