HNGV Problema “MS Sergio Dun Eis MS Nelson”

.

Jornal Nacional Diario - Kuarta-Feira, 05 Junho 2013 

Ministru Saude (MS) Sergio Lobo realsa katak, preokupasaun kona ba situasuan Hospital Nasional Guido valadares (HNGV) ne’ebe publiku kestiaona laos kulpa Governu Bloku Koligasaun nian, maibe Governu Aliansa Maioria Parlamentar (AMP) nian. 

Sergio Lobo konsidera, lideransa anterior iha Ministeriu Saude (Nelson Martins-red) se hela problema lubun ida iha HNGV ba iha Governu actual (Sergio Lobo-red) atu rezolve. 

“Situasaun kondisaun ne’ebe agora dadaun ema barak preokupa, ida ne’e hahalok at husi governu anterior ne’ebe soe hela ba governu foun, oras ne’e dadaun halo Ministru saude (MS) ulun moras no tenke responsavel ba hahalok at refere, ida ne’e ‘kebiasaan’ husi governu anterior nian nebe mak agora dadaun atu hadia, tanba kontratu sira ne’e mai uluk kedas laos foin mak mai,” Ministru Sergio Lobo informa ba jornalista iha HNGV, Bidau, TErsa (4/6). 

Atu buka solusaun ba problema ne’ebe mak HNGV infrenta, iha loron hanesan Ministru Sergio Lobo akompania husi Vice Ministra nain rua, Maria do Cheu no Natalia de Araujo halo inspesaun ba HNGV hodi hare diretamente kona ba kondisaun fizika iha HNGV inklui etendementu professional saude iha HNGV. 

Nune’e, realidade hatudu katak sala hotu-hotu HNGV nian hasoru problema ne’ebe mak hanesan deit, falta kurtina, laiha kolsa, kulsaun dodok, sumasu ba apsiente laiha, kama balun ain tohar inklui kondisaun haris fatin la Higenia. 

Haree ba realidade ne’e, halo Ministru Sergio Lobo hirus hodi hateten “ida ne’e laos mehi ou lia anin katak kondisaun HNGV la favoravel, maibe realidade hatudu katak kondisaun fizika HNGV laos estrandar nasional, maibe strandar distritu kompara nasaun sira seluk, tamba saida? 

Pasiente sira ne’ebe hali mai ospital espera katak bele kura sira nia moras, maibe kontradis ho esperensia ida ne’e tanba sira mai tenki toba ho kama ida ne’ebe ho kondisaun at, ho kama ida ne’ebe molik (alias laiha kolsa) sumasu la iha sa tan saniamentu mos at e foer iha liu higenia,” Sergio Lobo hirus. 

MS Sergio hirus liu tan, wainhira Ministru Sergio Lobo halo vizita ba aula xefe departementu, iha xefe departamente balun abandona servisu tuir orariu ne’ebe mak determinadu ona. Inspecsaun orjente ne’e nota mos katak, kona ba kompania ne’ebe durante ne’e kontrola Higenia HNGV nian, iha posiblidade atu hapara kontratu, tanba tuir Ministru saude nia observasaun kompania refere servisu la professional, faktu hatudu HNGV hare hanesan fatin lixu nian. 

Iha fatin hanesan Diretor HNGV Domingos da Silva konsidera inspecsaun ne’e normal akontese iha ne’ebe deit, duit Domingos da Silva katak, liu husi inspecsaun ne’e bele hadia sistema ne’ebe mak durante ne’e lao kleuk hela.

.