Governu La’o Fulan Nen Ona “OJE 2013 Foin Ezekuta 15%”

.

Foto, Luta Hamutuk

Jornal Nacional Diario - Kinta-Feira, 13 Junho 2013 

Governasaun Kintu (V) Governu Konstitusional lao ona fulan nen maibe Orsamentu Jeral Estadu (OJE) 2013 nian ne’e foin ezekuta 15%. Orsamentu Jeral estadu 2013 ne’ebe Parlamentu Nasional (PN) aprova hamutuk biliaun 1.3 Dollar Amerikanu ne’ebe fo perioridade ba ,saude, edukasaun, infraestrutura no agrikultura. 

Minimu Ejekusaun OJE 2013 ne’e, Organizasaun Luta Hamutuk (LH) eziji ba Primeiru Ministru (PM), Kay Rala Xanana Gusmao atu kontrola membru Governu sira hodi bele ezekuta Orsamentu Estadu nian ne’e ho diak. 

 “Monitoramentu ne’ebe Luta Hamutuk halo ba prosesu ezekusaun OJE identifika katak, to’o ona iha tinan klaran (Junho 2013) Governu foin maka bele ejekuta orsamentu hamutuk U$239,8 (15%),” Diretur Ezekutivu Luta Hamutuk, Mericio Akara deklara asuntu ne’e liu husi konferensia da imprensa, Kuarta (12/6) iha Edifisiu Luta Hamutuk, Farol, Dili. 

Tuir Observasaun Luta Hamutuk, durante fulan hirak nia laran ne’e Governu ladun seriu atensaun ba ezekusaun orsamentu tinan fiskal 2013 hamutuk biliaun U$1,647,519. 

Tanba nia dehan, se kuandu ezekusaun orsamentu lao diak sei fo impaktu ba povu hanesan infraestrutura baziku hanesan bee mos, estrada, fasilidade eskola inklui klinika mos hetan progresu no area sira seluk tan. 

Bazeia monitoramentu Luta Hamutuk konsege identifika Minsteriu Rekurus Naturais e Minerais ezekuta ona 81%, Ministeriu Negosiu Estranjeiru 31% no Parlamentu Nasional Ezekuta ona 31%. Akara haktuir, iha tinan fiskal 2013 Governu kontinua aloka osan ba kategoria despeza kapital dezenvolvimentu ou infraestrutura fiziku hamutuk miliaun U$756,8 maibe orsamentu ne’e foin maka ezekuta to’o U$47,4 (4%), signifika to’o ona iha fulan Junho (Tinan klaran) ne’e programa Dezenvolvimentu itegradu Distrital (PDID), Programa Nasional Dezenvolvimentu Suco (PNDS) no fundu infraestrutura seidauk implementa. 

 Alende ne’e, Luta Hamutuk mos husu ba Estadu no Governu atu labele repete fila fali failansu ne’ebe akontese iha tinan kotuk, tanba failansu mak mosu mal jestaun iha prosesu impelmentasaun orsamental. 

Husu mos ba orgaun hotu-hotu atu iha displina atu ezekuta tuir lei orsamentu haruka, atu nune’e labele akontese re-orsamentu ho montante barak iha ano fiskal tuir mai.

.