Governu kontinua hatudu inkapasidade hodi ezekuta Orsamento Geral do Estado 2013...!!! - Luta Hamutuk

.

LUTA HAMUTUK

KOMUNIKADU DA IMPRENSSA: Governu kontinua hatudu inkapasidade hodi ezekuta Orsamento Geral do Estado 2013...!!!

Tuir Luta Hamutuk nia monitoramentu ba Orsamento Geral do Estado (OGE) katak, iha fulan hirak nia laran Governu ladun tau atensaun ba prosesu ezekusaun OGE, maibe preokupa liu mak asuntu sira ne’ebe mak ladun relevante ho prioridades ne’ebe defini iha planu dezenvolvimentu nasional. Iha fulan Febreiru tinan ne’e, Parlamentu Nasional aprova Orsamento Geral do Estado (OGE) tinan fiskal 2013 hamutuk biliaun $1,647 dollar. 

Ita hotu hatene katak, aprovasaun OGE 2013 ho unanimidade, laiha vota kontra ne’ebe signifika hetan apoio tomak husi membro Parlamento Nasional hotu-hotu.

Iha inisiu kedas Luta Hamutuk preokupa ho prosesu planeamentu to’o diskusaun orsamento 2013, tanba prosesu planeamentu no diskusaun orsamento la tuir ona siklus normal orsamento ne’ebe implika dadaun ezekusaun orsamento annual.

Rezultadu monitoramentu ne’ebe Luta Hamutuk hala’o ba prosesu ezekusaun OGE, identifika katak to’o ona iha tinan klaran (Junho 2013) Governu foin halo ezekusaun real/ aktual ba OGE 2013 hamutuk miliaun atus $239,8 dollar (15%) (fonte: www.transparency.gov.tl).

Rezultadu ida ne’e hatudu katak, Governu kontinua hatudu ninia dezenpenho ezekusaun orsamento ne’ebe mukit tebes no hatudu seidauk iha kapasidade atu ezekuta orsamento ho montante bo’ot. Relasaun ho OGE 2013, bainhira prosesu debate iha Parlamento Nasional ami kestiona proposta OGE ne’e rasik; tanba orsamento ne’ebe bo’ot la-reflete ho kapasidade ezekusaun ne’ebe hatudu ona iha tinan 2012. Ezekusaun OGE 2012, Governu la konsege ezekuta hotu, nune’e tenke reorsamenta tan ba tinan fiskal 2013 hamutuk milaun atus $670 dollar ba iha saldo tezoreiru Governu nian.

Hanesan ita hotu hatene katak iha tinan fiskal 2013 Governu mos kontinua aloka osan lubuk ida ba iha kategoria despeza Kapital Dezenvolvimentu (infrastruktura fiziku) ne’ebe hamutuk miliaun $756,8 maibe orsamentu ne’e foin mak bele ezekuta to miliaun $37.4 (4%). Signifika katak, to’o ona iha fulan Junho (tinan klaran) programa dezenvolvimentu infrastruktura fizika hanesan Programa Dezenvolvimentu IntegraduDistrital (PDID), Programa Nasional Dezenvolvimentu Suco (PNDS) no Fundu Infrastruktura sidauk implementa ida.

Ami deskobre mos ezekusaun OGE ne’ebe mak sei kiik tebes ne’e tanba implikasaun husi kapasidade ezekusaun instituisaun / ministeriu sira ne’ebe mak nia rezultadu ezekusaun sei menus husi 30%, tuir kalendariu ezekusaun, iha funan nen nia laran ezekusaun lolos tenki atinzi 50%. Maioria kategoria despezas ba ministeriu no instituisaun estadu hatudu sei menus husi 30%, ne’e signifika orgaun do estadu maioria sei mukit kapasidade de ezekusaun. Iha deit ministeriu tolu ne’ebe mak atinzi liu30%, mak hanesan Ministeriu Rekursu Naturais e Minarais to’o 81% (liu tiha ezekusaun normal ne’ebe mak maximu 50% iha fulan nen), Ministeriu Negosios Estrangeiros e Cooperação to’o 31%, Parlamentu National to’o 32%.

Ami identifika mos katak iha Ministeriu Edukasaun e Cultura (exklui Ministeriu Edukasaun ne’ebe ketak ida) nia ezekusaun akontese fali -$323,000.0, ministerio ne’e inisiu laiha alokasaun orsamento maibe iha rubrika ezekusaun nian akontese despeza ne’ebe menus (-). Perguntas mak ne’e, osan ne’e mai husi ne’ebe? No se los mak halo ezekusaun? (http://budgettransparency.gov.tl/).

Bazeia ba resultadu monitoramentu ne’e, tuir mai Luta Hamutuk hakarak rekomenda pontus importante balun relasiona prosesu ezekusaun OGE 2013:

1. Husu ba Primeiru Ministru nudar chefe do governu, atu toma atensaun no kontrolla ho rigorozu ba Ministeriu / instituisaun sira ne’ebe mak nia ezekusaun seidauk atinzi 50% maske fulan 6 ona. 

2. Husu mos ba Governu atu labele repeta bebeik faillansu ne’ebe akontese iha tinan kotuk, tanba faillansu mak akontese ne’e bele hamosu mal jestaun iha prosesu implementasaun orsamento estado. 

3. Husu ba orgaun estadu hotu, atu displina iha ezekusaun orsamento tuir lei Orsamentu no Jestaun Finanseiro haruka. Atu nune labele akontese reorsamentado ho montante bo’ot kada tinan. 

4. Husu ba Ministeriu Edukasaun e Kultura atu esplika, tanba saida mak iha ezekusaun maske laiha alokasaun orsamento maibe ikus ne’e akontese despeza ne’ebe hatudu -$323,000.0 dollar. Fontes osan ne’e mai husi ne’ebe?

Ba ita hotu nia atensaun no kooperasaun, ami hato’o obrigado wain!

Dili, 12 Junho 2013

Mericio Akara
Executive Director Luta Hamutuk
Tel: 77263783