“Governu Balun Nia Konta Bankaria Iha Estranjeiru”

.

Jornal Timor Post - Sesta-Feira, 07 Junho 2013 

Organizasaun naun Govermental Lalenok ba Ema Hotu (LABEH), liu husi servisu departementu transparansia no akuntabilidade detekta ona membru governu balun iha konta bankaria iha rai liur ne’ebe bele sai ameasa ba krime fase osan (Money Laundering). 

“Oras ne’e dadaun mundu tomak halo kampania maka’as no luta kontra anty money loundring ho kriminaliza aktus tranzaksaun ida ne’e tanba fase osan nudar sistema transferensia osan husi hahalok krime publiku nian hanesan korupsaun,” dehan director ezekutivu LABEH Julio da Costa liu husi koferensia imprensa iha edifsiu LABEH Kampung baru, Kinta (6/6). Nia hatutan katak, dadaun ne’e membru Governu balun iha konta bankaria iha rai liur ne’ebe transfere osan husi banku ida husi nasaun seluk, tanba ne’e Timor Leste tenki evita aktu hahalok fase osan ne’e identifiku liu ba ema ne’ebe kaer ukun. 

 “Atu antisipa krime finanseiru ne’e, ne’ebe komesa envade Timor Leste, LABEH hakarak ejiji ba estadu atu ratifika rejime internasional ba fase osan ninian (internasional anti money laundring regimen) no estabelese unidade intelejensia finanseiru ne’ebe bele halo servisu diak liu tan hodi kontrola tranjaksaun osan husi ema sira ne’ebe kaer ukun,” Dehan Julio. 

Nia mos husu ba Ministeriu Publiku (MP) atu estabelese unidade anti korupsaun iha Tribunais sira, nune’e servisu kombate korupsaun bele lao ho efetivu no bele haforsa liu tan prosesu foti desizaun ne’ebe justu. 

 “Tempu besik sei realiza audensia ka diskusaun ho sosiedade sivil parlamentu nasional no mos asosiasaun advogadu Timor Leste nian atu deskute kona ba posiblidade kriasaun lei domestika ba anti money loundring,” nia dehan. “LABEH mos sei fasilita diskuasaun kona ba financial action taks Force (FATE) hanesan estratezia prevensaun ba fase osan nian,” Julio esplika. 

Diretor LABEH ne’e mos informa ba publiku katak, Timor Leste oras ne’e iha ona osan mina hamutuk U$13,6 billiaun no dadaun ne’e explorasaun mina no gas produz osan hamutuk $324 miliaun kada fulan. 

.