“FTM Husu PNTL Kontrola Fatin Prostituisaun”

.

Jornal Independente - Kuarta-Feira, 12 Junho 2013 

Organizasaun naun Govermental Forum Tau Matan (ONG-FTM), husu ba parte seguransa no lider komunitaria atu tau atensaun masimu hodi kontrola fatin prostituisaun ne’ebe buras iha kapital Dili. 

Koordenador protesaun ba labarik, Honorio Soares Almeida hateten, fatin prostituisaun fo influensia boot ba labarik sira ne’ebe maka loro-loron haree situasaun hanesan ne’e, tanba, afeita ba mentalidade labarik sira nia hodi kapta hahalok feto prostituisaun. 

“Kuandu labarik ida mak moris iha komunidade nia leet no loro-loron haree asaun ne’e, nia garava ona buat ne’ebe la diak, entaun ital abele kontribui atu hadia labarik nia situasaun,” dehan nia iha nia kna’ar fatin, kaikoli-Dili (11/6). 

 Honorio hatutan, komunidade autoridade lokal sira tenki haree no foti asaun ba asuntu sira hanesan ne’e, tanba ne’e hanesan edukasaun negativu. 

Tuir nia, atu rezolve problema ne’e, tenki iha lei ne’ebe mka forte no diak atu regula grupu sira ne’ebe halo aktu prostituta ne’e. “Tenki iha politika lejislasaun no ita tenke iha lei ne’ebe maka koalia kona-ba protesaun labarik sira nian iha partisipasaun ba dezenvolvimentu,” tenik nia. 

 Nune’e, Honorio dehan, Polisia sira mos tenke hala’o knaar ho diak hodi bele alumina no asegura asaun prostituta ne’ebe mak halo iha komunidade nia leet. 

Tuir nia, asaun prostituta ne’ebe mak halo iha komunidade nia leet bele hamosu krime foun, tanba aktu inmoral, entaun komunidade sir abele hamrik no halo asaun hasoru sira. 

.