“Fatin Protistuisaun Iha Labarik Sira Nia Klaran”

.

Jornal Independente - Tersa-Feira, 11 Junho 2013 

 Fatin Prostituta oras ne’e kontinua buras iha komunidade sira nia let, pior liu mak fatin prostituisaun ne’e iha loos labarik sira nia halimar fatin no komunidade sira nia uma oin. 

Ho situasaun ne’e, komunidade sira iha Bairo Perumnas Suku bairu-Pite, Sub Distritu Dom Aleixo, Distritu Dili halo protesta maka’as hasoru uma nain ne’ebe konsidera hakia’k feto prostistuisaun iha sira nia uma oin. 

Komunidade sira mos ezizi ba Polisia Nasional Timor Leste (PNTL) atu hala’o operasaun ba fatin prostituisaun ne’e. 

Jose das Neves komunidade bairo Perumnas hateten, sira la kontenti ho ezistensia fatin prostituisaun iha sira nia le’et, tanba ne’e mak nia husu ba Polisia, liliu Polisia Migrasaun atu bele halo atuasaun hasoru fatin ne’e. 

 “Ami husu para atu kaer ema sira ne’e tenke fo sansaun todan liu mak ba uma nain ne’ebe mak sai patraun ba feto sira ne’e hodi hetan osan,” hateten Jose ba INDEPENDENTE iha nia hela fatin Perumnas (10/6). 

 Iha fatin hanesan, Agida da Silva mos la menta tebes ho fatin ne’e tanba bele estraga labarik no joven sira iha bairo ne’e nia futuru, nune’e nia husu atu atividade hanesan ne’e labele iha los komunidade sira nia leet no labarik sira nia halimar fatin. “Hau respeita ema ida-idak ninia direitu atu halo buat hanesan ne’e, maibe pelumenus labele iha ne’e tanba ne’e iha los komunidade sira nia let,” dehan Agida. 

Entertantu, Xefe Suku bairo-Pite Joao belo hatete, sei kopera ho Polisia Migrasaun no komunidade bairo ne’e atu bele hala’o atuasaun ba fatin ne’e, tanba tuir nia, ezistensia fatin prostituisaun iha komunidade nia leet ne’e la diak, nia dehan pior liu tan mak fatin ne’e iha los komunidade nia let. 

 “Hau sei kopera ho hau nia xefe Aldeia sira no komunidade sira atu halo intervensaun ba fatin ne’e,” hateten xefe Suku ne’e. 

 Antes ne’e, Diretor Polisia servisu migrasaun Superitendente Xefe Jose da Costa hateten, sira identifika ona fatin prostituisaun tolu iha Dili inklui Bairu-Pite nee no iha tempu besik sira sei halo operasaun ba fatin sira ne’e.

 .