“Eskola 2 Konsumu Foos At”

.

Jornal Timor Post - Kinta-Feira, 13 Junho 2013 

Monitorizasaun husi Sindikatu Professores Timor-Leste (SPTL) detekta eskola baziku rua hanesan eskola Baziku Hera no Hudi-Laran (Bairo-Pite) mak oras ne’e konsume foos at ne’ebe distribui husi Ministeriu Edukasaun. 

“Hanesan iha eskola baziku hudi-laran, foos ne’ebe lori ba ne’e kinur no dook hotu no balun ut hanesan simente,” Protavoz SPTL Francisco da Costa, Fernandes, liu husi konferensia imprensa ne’ebe hala’o iha Knua Buka Hatene (KBH), Mandarin, Kuarta (12/6). 

Aleinde ne’e, haktuir, iha eskola baziku Hera mos kuaze hanesan, tanba foos ne’ebe lori ba, bainhira hatun husi kareta, hanesan fali hatun simente tanba suar maka’as loos. Ne’eduni, nia dehan, SPTL la konkorda atu halo distribuisaun foos hanesan ne’e ba eskola sira, tanba bele fo impaktu la diak ba kondisaun saude labarik sira. 

 “Hau hanoin foos ida ne’e rai iha armazen hanesan haluha tiha ona, to’o ikus kuandu ema toka ona katak, eskola sira la asesu ba merenda eskolar, mak sira hakfodak hodi halo distribuisaun maibe la-hare kona ba kondisaun foos ne’ebe iha,” dehan Porta Voz. 

SPTL mos kestiona katak durante ne’e, Politika Governu liu husi Ministeriu Edukasaun so halo distribuisaun foos ho mina deit, maibe kona ba aliemntasaun seluk laiha atu kompletu merenda eskolar, no husu atu diak liu ME forma Konsellu dos pais hodi nune’e bele jere orsamentu ho diak ba iha parte edukasaun ne’ebe to’o ohin loron sai preokupasaun.

,