“Eis Titulares Labele Eskluzivu”

.

Foto de, Veronica Fernandes

Jornal Timor Post - Segunda-Feira, 03 Junho 2013

Eis Prezidenti Parlamentu Nasional Primeira Lejislatura, Francisco Guterres ‘Lu-Olo’, Eis Primeiru Ministru Mari Alkatiri deskuti hamutuk ho Prezidenti Republika, Taur Matan Ruak hodi hadi’a propriu konstituisaun , nune’e eis titulares sira la bele deskansa de’it. Xefi Estadu Taur iha Sesta (31/5) semana kotuk ba rezidensia atual Sekretariu jeral Partidu FRETILIN iha Farol, Dili hodi halo diskusaun sobre kestaun nasional ho Mari Alkatiri no Francisco Guterres ‘Lu-Olo. 

Iha inkontru ne’ebe hala’o kuaze oras rua resin, lideransa nain tolu ne’e deskute maka’as sobre eis titulares sira nia partisipasaun iha prosesu dezenvolvimentu, tanba nuudar eis titulares no veteranus la bele deskansa deit. Maibe atu realiza kestaun ne’e, presija hadiak proprio konstituisaun sobre partisipasaun eis titulares sira nian iha prosesu dezenvolvimentu no konstrusaun estadu Timor Leste. 

“Ami mos koalia kona ba ita nia propriu konstituisaun, tanba ne’e ita presiza hadiak nune’e aban-bainrua, ami eis titulares sira labele desknasa de’it, presija ami mos partisipa nafatin, maibe pronto durante ne’e ami dalan laiha atu halo nusa,” Lu-Olo hateten. 

 Lu-Olo dehan, kestaun ida ne’e boot tebes tamba sei iha nafatin diskusaun entre xefi estadu ho lideransa partidu FRETILIN. 

 “Ami sei hasoru malu bei-beik para tau ideas diak liu tan,” Lu-Olo hateten. Entertantu, Eis Primeiru Ministru Mari alkatiri hateten, nia sente kontenti tebe-tebes tamba hetan vizita husi Xefi Estadu hodi deskute sobre problema interese nasional. 

“Primeiru Ministru (Xanana Gusmao) kuandu mai, ami sei ba halibur fatin atu haree buat sira ne’e hotu,” dehan Alkatiri. 

Mari Alkatiri sublinha liu tan katak, wainhira Xefe Governu fila husi nia vizita rai liur sei halibur malu fali entre lider sira hodi dikute klean liu tan problema assuntu nasional nian. 

Aliende ne’e, iha diskusaun entre xefi estadu ho eis titular Lideransa FRETILIN ne’e koalia mos sobre asuntu veteranus no kombatentes ne’ebe mak to’o ohin loron seidauk iha solusaun. 

“Problema veteranus la hotu, tanba veteranus barak liu agora ona, tanba ne’e ami sei haree hamutuk para rezolve iha tempu badak nia laran,” Lu-Olo hateten. 

Iha enkontru ne’e, xefe estadu husu ba eis titulares nain rua atu kontribui ideia, nune’e rezolve problema veteranus neebe maka to’o ohin loron seidauk rezolve. 

Iha biban ne’e, deskute mos preparasaun Timor Leste nian atu simu Prezidenti organizasaun Luzofonia, Comnidade Pais Lian Portuguesa (CPLP) iha tinan 2014 to’o 2016 no preparasaun adejaun Timor Leste ba ASEAN. 

,