Dr. Mari Alkatiri: “Zona Espesial La’o Hamutuk Ho Munisipiu”

.

Jornal Timor Post - Sabadu, 01 Junho 2013 

Eis Primeiru Ministru Dr. Mari Alkatiri deklara, Projeitu Pilotu Zona Espesial ekonomia Sosial sei la hamutuk ho programa desentralizasuan administrativa no poder lokal iha Distritu Oe-Cusse. 

 “Balun husu projeitu pilotu zona ekonomia social iha Oe-Cusse ne’e munisipiu mak hela iha sidade ka iha Zona espesial mak hela iha sidade, mais hau dehan lae, sira dame malu iha ita iha sidade,” aktuir Mari Alkatiri ba partisipante sira iha seminariu Internasional, kona ba desentralizasaun administrativa no poder lokal iha Centru Convensaun Dili (CCD), kuarta (29/05). 

Mari Esplika, projeitu pilotu ne’e sei hahu husi Distritu Oe-cusse depois sei alarga ba Distritu sira seluk iha Timor laran tomak. 

 Importante ba Timor Leste agora mak tenki kria kondisaun hanesan aprova leis hodi bele fo garantia ba ema investor sira atu mai investe iha TL, maibe presiza mos hadia infra-estrutura, edukasaun, Saude, no selu-seluk tan. “Sistema lei tributaria, lei imigrasaun ho lei sira seluk ba zona espesial iha Distritu Oecusse, tempu besik sei aprezenta ba Governu,” haktuir Mari. 

Atu realiza projeitu pilotu ne’e, Mari hateten, presiza servisu maka’as no kolaborasaun orgaun estadu, Governu, Parlamentu Nasional no sosieade tomak. 

Mari mos konkorda politika desentralizasaun administrative no poder lokal ne’ebe atu transforma komunidade husi sidade ba rural, atu nune’e bele hala’o dezenvolvimentu iha Distritu 13. 

 “Esforsu boot ne’ebe Primeiru Ministru halo ita louva, maibe ita hotu mak tenki hanoin, Munisipiu iha Portugal, Cavo verde, no Timor sei la hanesan, sei lao tuir ida-idak nia kondisaun nasaun nian,” dehan Mari. 

.