“Dotor Timor-oan 100 Seidauk Simu Salariu”

.

Jornal Independente - Segunda-Feira, 03 Junho 2013 

Dotor timoroan hamutuk atus ida resin ne’ebe rekruta husi Ministeriu saude durante fulan tolu ona seidauk simu salariu tanba prosesu pagamentu atrazadu. 

 Diretor rekursu umanu Ministeriu Saude, Duarte ximenes rekonese dotor sira ne’ebe foin lalais rekruta hodi koloka ba ospital sira iha teritoriuTimor-Leste balun seidauk simu sira nia salariu durante fulan tolu ona. Maibe diretor ne’e mos la esplika orsamentu ne’e atraza iha fatin ne’ebe. 

“Prosesu pagamentu atraza duni, maibe ami prosesa ona iha semana kotuk,” hateten Diretor Duarte ba Jornalista semana kotuk. 

Nia mos la esplika orsamentu ne’e atraza iha fatin ne’ebe. Salariu ba dotor sira ne’ebe foin simu posse hetan U$600 kada fulan, salariu ba infremeira no parteira hetan U$450 kada fulan, salariu ba ekipa tekniku hetan U$400 kada fulan. 

Ministeriu Saude hamutuk ho Kimisaun Funsaun Publiku (KFP) fo posse ona ba funsionariu foun hamutuk ema nain 449 ne’ebe kompostu husi dotor nain 397, enfermeira nain 11, parteira nain 21 inklui ekipa mediku seluk hamutuk ema nain 19. 

Maibe tuir politika liu husi Ministeriu saude sei halo tan rekrutamentu foun ba dotor hamutuk nain 640 hodi koloka ba iha sentru saude sira iha teritoriu tomak. 

Dotor ida (fontes hanonimu) ne’ebe hasai lisensatura kona ba enfermajen jeral iha Universidade Havana, Cuba sente triste oituan kona ba prosesu pagamentu ba sira nia salariu ne’ebe lao neineik liu. 

Nia dehan, durante fulan tolu ona seidauk simu salariu husi fulan Marsu to’o fulan Maiu foin lalais, situasaun ida ne’e difikulta tebes atu halao serviso atendementu ho diak tanba dotor balun hela iha area remotas ne’ebe susar tebes atu hetan apoiu finanseiru husi sira nia familia kona ba nesesidade loro-loron. 

 Kestaun ne’e, Ministru saude Sergio Lobo lakoi fo komentariu. 

“Hau la iha komentariu kona ba kestaun ne’e, hau ba lalais lai, tanba Vice Primeiru Ministru hein hela hau agora,” Hateten Ministru Lobo ba Independente iha Timor Plaza, sabadu semana kotuk. 

.