“Deputadu PN Husu Imigrasaun Aperta Ema Ilegal”

.

Jornal Independente - Kinta-Feira, 13 Junho 2013 

Ezistensia ema estranjeiru illegal sei fo impkatu makaas ba seguransa no ekonomia nasaun nian, tanba ne’e, membru Parlamentu Nasional (PN) husu atu kontrola maka’as movimentu ema sira ne’ebe hela illegal iha Timor-Leste. 

Prezidenti Komisaun B PN, Maria Lourdes Bessa hateten, presiza duni PNTL liliu imigrasaun no Unidade Polisia Fronteira (UPF) atu kombate no asegura dalan illegal ne’ebe sidadaun estranjeiru uza hodi hala’o viazen iha Timor Leste. 

 “Kuandu ita nia seguransa ladun seriu kontrola ema sidadaun tama illegal, ne’e sei fo impkatu negativu ba ita rain iha futuru, liuliu iha area ekonomia no seguransa,” dehan nia, iha uma fukun PN (12/6). 

Deputada Maria dehan, sidadaun ida tama illegal no hela illegal iha TL ne’e iha razaun negativu mak barak, nia fo ezemplu, buka osan ho dalan illegal no bele mai kria grupu hodi estraga instabildiade iha rai laran. 

 Tanba ne’e, nia dehan, presiza hametin servisu Polisia Imigrasaun atu halo koordenasaun diak ho nasaun vizinhu sira hanesan, Australia, Filipina, Malazia, Singapura inklui Indonezia atu kontrola ida ne’e. 

Tuir nia, maske durante ne’e polisia imigrasaun halao servisu tuir nia knaar ho professional, maibe presiza hadia failansu balun no hametin relasaun no kordenasaun inklui aforsa servisu ho nasaun vizinu sira. 

 “Ita lalika halua ema uza ita nia rain hanesan odamatan tranzito, inklui ita tenki hadia kondisaun fronteira ho seguru,” tenik nia. Iha fatin hanesa, Prezidenti Komisaun G PN, Mateus de Jesus hateten, presiza husu no investiga sidadaun estranjeiru ne’ebe tama illegal atu hatete loloos razaun saida mak halo sira hakarak tama illegal mai Timor-Leste. 

Tuir nia, presiza halo sosializasaun ba embaixador estranjeiru sira iha TL atu fo hanoin ba nia sidadaun sira bainhira hakarak vizita TL tenki tuir lei no orden.

.