DEKLARASAUN POLITIK
BANCADA PARLAMENTAR DA FRETILIN
KONABA SAÚDE IHA RAILARAN
Plenaria PN, 18/06/ 2013
Exmo, Sr. Presidente do Parlamento Nacional,
Distintos deputados no Povo Maubere, mak ami
respeita.
Ohin, FRETILIN hakarak declara iha nee,
realidade ruma iha ministério saúde nia laran nebe seidauk lori benefecio ba
povo nia moris. Argumentu sira tuir mai nee foti hosi observasaun ba governu
nia exekusaun ba Orsamento estadu nian nebe deputadu sira iha komisaun
competente relata ba Parlamento Nasional hosi fiskalizasaun. Nunee mos foti
hosi keixa sira nebe tama iha Parlamentu Nasional no hosi opiniaun publik nebe
fo sai iha media eletronik no jornais, konaba saúde nian iha Timor-leste.
Sistema saúde iha railaran, ohin
loron, hakiduk uitoan ba kotuk tanba hahalok balu latuir ona Lei no 10/2004, 24 Novembro
haruka: (1) iha governasaun AMP, laiha
koperasaun diak entre ministério sira konaba saúde nian mak hamosu deskontentamentu hosi populasaun ba servisu saúde
nian; (2) iha governasaun ida nee, governu
desolve tiha Conselho Administração SAMES ho deit resolução no 22/2012,
31 de Outubro, tan deit iha irregularidades; tuir lolos, governo revoga mak Decreto-lei
no 2/2009, 15 de Janeiro konaba SAMES hodi hadiak irregularidades;
mudansan nee hamosu deit mak desvalorizasaun ba estadu nia despezas no
descontentamento iha sociedade; (3) iha mos desobediencia profecionais saúde nian ba Decreto-lei
no .../15 de Novembro 2004 konaba Unidades privadas de saúde nian mak halo
asistencia saúde mos ladiak duni; (4) menus atensaun ba hadiak kondisaun
infraestruturas no ben-estar profesionais saúde nian mos halo profesionais
saúde
nian lakon ánimo iha asistencia ba moras sira; nune mos apoio logistik no
equipamentos saúde nian menus liu halo asistencia medika mos ladiak duni; (5) programa
Sisca, desde governasaun AMP too agora funciona ladiak, halo populasaun sira
iha rural barak liu mak lahetan asistencia médica; (6) saúde publiku no ambiente
iha capital distritu nian deskontroladu, consumidores sira dalabalu han hahan
nebe prazo liu ona, kumunidade sira nia hela-fatin foer tebes duni, no sst. Realidade
nee hatudu katak sistema saúde iha railaran hosi
aspecto hotu-hotu menus kontrolu no laiha tranformasaun signifikante, tanba iha
desobediência ba regras no gestão ladiak, bele mos tanba iha conflito de
valores eh interesse política iha governasaun nian.
Iha nível institucional, tuir governu nia
relatório anual 2012, hatudu kontradisaun balu entre knar ministério nian ho
situasaun real populasaun nebe menus beneficio hosi despezas estadu nian: (1)
plano estratezico ba nutrisaun, saúde maternal no infantil, no saúde oral,
lahatudu tranformasaun nebe significante, tanba iha fatin barak nebe komisaun
competente ba fiscaliza, hetan deit mak labarik sira barak liu saúde ladiak,
moris nafatin iha ambiente nebe lasaudavel, mesak moe-dor no kreskas-maran deit
tanba nutrisaun ladiak; (2) Governu rekruta-tan ona funcionário publik 68 iha
ministério saúde maibe iha fatin rural, asistensia saúde ba moras ladiak nafatin
eh ema latoo nafatin; maibe ministério abandona tiha médicos foun sira nebe
foin graduadu too oras nee sira seidauk halo knar nudar mediku no hein deit iha
fatin; (3) Regime ba kareira especial aplika ona maibe sei iha ema
profissionais saúde nian barak mak seidauk hetan sira-nia direitu nee; (4)
Desolve tiha Conselho Administrasaun SAMES no hari fali Comissaun temporário
ida, maibe iha hospital distritais sira aimoruk latoo nafatin ba moras sira, no
iha tinan kotuk ministério saúde haruka sunu tiha aimoruk nebe expire ona, nebe
sosa ho osan Dolar amerika juta ida resin; (5) iha nomeiasaun ba kargu chefia
nian iha hospital balu, lahare ba prfesionais saúde nian nebe digno tuir
kareira profesional, maibe hili fali sira nebe menus profesional eh iha relasaun
parentesku no kolegas hodi hamosu descontentamento; etc.
Iha nível prestasaun ba saúde primaria no
hospitalar mos hanesan, ministério halao duni nia knar maibe povo barak liu mak
menus beneficio ba saúde diak, tuir relatório komisaun competente hatudu katak:
(1) labarik tinan lima mai kraik iha rural, barak liu mak lahetan asesu ba
tratamento saúde; (2) prestasaun servisu saúde ba moras nebe kontasioza no
lakontaziozas lafunciona ho diak tanba menus controlo eh apoio ba asistencia
hosi monisterio; (3) kampanya ba sensibilizasaun ba ambiente saudável iha fatin
urbana lafunciona, halo populasaun sira moris nafatin deit iha ambiente nebe
foer; (4) sasan medicina nian nebe bele fo apio ba mediku sira atu atende moras
iha hospital distrital iha fatin balu laiha, lasuficiente iha fatin falu no
sira nebe at ona laiha saseluk; (5) iha moras ruma atu haruka ba tratamento iha
rai-liur, halo ho perferencia ba ema balu deit, maibe lei inan dehan katak ema
hotu-hotu iha direito hanesan iha lei nia okos; (6) ambulance nebe opera iha
hospital distritral barak mak kondisaun ladiak, maibe ministério lahalo
manutensaun ba eh lasosa foun, maski ministério mos hatene katak estrada iha
distritu sira kondisaun ladiak no distancia ba transportasaun moras mos dook
tebes; (7) infraestrutura hospitalar iha distritu balu mak kondisaun ladiak no
lasaudavel atu profesionais sira halo asistensia ba moras; konstrusaun ba edifício
foun balu nebe importante tebes ba saúde halo lahotu no husik deit; (8) funcionário
saúde nian nebe servisu liu oras normal lahetan subsidu ruma hosi ministério
tuir lei haruka; etc.
Realidade nee haklaken ba publiku katak: (1)
Governu seidauk halo tuir lolos Lei-inan artigo 57: 1-2 haruka, no lei numeru
10/2004 konaba sistema saúde nian; (2) plano no programa konaba saúde nian
kapas tebes maibe lakonsege implementa eh laiha kbit atu implementa; (3) hatudu
susesu iha relatório anual maibe iha realidade hatudu insusesu, tanba laiha
servisu hamutuk entre ministério nebe iha relasaun ba malu no laiha kordenasaun
diak iha ministério saúde nia laran; (4) Hahalok sira nee hatu katak: (a) iha nepotismo
eh favoritismo iha nomeasaun politique ba kareira profesional iha ministério saúde
nian; (b) iha posisaun politique nee revela deit mak interese privadu, laos
hatudu hahalok patriotismo atu hadiak povo nee nia moris; (c) tan nee mak
ministro ida tun no ida seluk sae halao sistema saúde tuir gosto deit, nee mak hamosu
desobediência ba leis no halo gestaun ladiak, ikus mai laiha duni tranformasaun
nebe signifikante iha povo nia moris.
Tan nee, Fretilin recomenda: (1) Governu presiza
hadiak gestaun iha ministério saúde atu bele fo beneficio ba povo maioria,
tanba independência RDTL nee restaura tinan 11 ona maibe povo maioria seidauk
sente beneficio iha saúde hosi despeza estadu nian; (2) Hadiak kondisaun
hotu-hotu tuir lei haruka atu profesionais sira iha asesu atu fo asistensia ba
moras no hadiak ambiente nebe saudável ba povo; (3) diak liu karik, halo
remodelasaun iha governu, liu-liu iha ministério saúde; hatudu cidadaun nebe
iha patriotismo forte no hakarak duni atu hadiak povo nia moris.
Obrigado, bancada FRETILIN, viva RDTL!
@ Joaquim dos Santos Boraluli, 18/6/2013
.
Sem comentários:
Enviar um comentário
Nota: só um membro deste blogue pode publicar um comentário.