Burokrasia Ezekusaun OJE “Deputadu CNRT-FRETILIN Husu Altera Lei”

.

Jornal Timor Post - Kuarta-Feira, 12 Junho 2013 

Deputadu sira husi bancada CNRT no FRETILIN husu atu altera lei jestaun finanseiru ne’ebe vigora iha 2010, nune’e mos, Governu tenki aprezenta relatoriu projeitu ho montante U$500 mill ba leten, ba Tribunal kontas hodi halo apresiasaun, hafoin ezekuta. 

 Tuir Deputadu Arao Noe husi bancada CNRT, Ezekusaun Orsamentu Jeral Estadu (OJE) 2013 atrazu iha fator rua, aprovasaun OJE 2013 (1), no lei jestaun finanseiru, tanba oras ne’e besik iha tinan klaran ona governante sira seidauk implementa projeitu sira. 

 “Fator rua mak fo atraju ba ezekusaun orsamentu jeral 2013, ne’e razaun mai husi meiadu 2012 halo eleisaun parlamentar, depois tomada de posse ba governu no halo debate programa governu, debate orsamentu retifikativu ho debate OJE 2013,” Deputadu Arao ba Timor-Post hafoin plenaria iha Parlamentu Nasional, Tersa (11/6). 

Deputadu husi Bancada CNRT ne’e dehan tan katak, bainhira iha 2011 protesta maka’as alterasaun dekretu lei jestaun finanseiru ba projeitu ne’ebe ho osan montante U$500 mill ba leten, Tribunal de kontas tenki hetan apresiasaun hafoin bele implementa. 

Tanba ne’e, mai iha mandatu terseira lejislatura, nia parte pronto atu propoin ba meza PN atu halo alterasaun lei refere fo limiti ba projeitu ho montante boot. 

“Agora ita haree katak, lei ne’e fo impaktu boot ba ezekusaun orsamentu, se kuandu projeitu quinentus mill ne’e mak barak to’o atus lima, mak ita hein too loron atus lima mak foin bele implementa,” nia dehan. 

 Nia sujere ba PN atu altera lei refere muda husi U$500 mill ba U$1 miliaun ba leten maka Tribunal de kontas bele halo apresiasaun no U$1 mai kraik Ministeriu ida-idak ou ADN (Ajensia Dezenvolvimentu nasional) ezekuta rasik, maibe kumpri nafatin lei aprovizionamentu. 

Enkuantu, Florentina Smith husi Bancada FRETILIN hateten, bainhira sira dezloka ba iha Distritu 13 haree Ministeriu ho sekretariu estadu sira seidauk implementa projeitu 2013, halao tuir programa Governu. 

“Agora ezekusaun ne’e la dauk hahu, embora iha 15 oursentu ne’e iha parte kiik ida husi total aprova surat ba projeitu hotu maibe iha terenu seidauk hahu,” Florentina hateten ba Timor Post foin lalais ne’e.

 Nia hatutan, Ministeriu Financas atualiza sistema jestaun foun, rekursu umanus husi Ministeriu ida-idak mos la to’o, ezemplu kuandu emprezariu ruma lori dokumentus halo sala oituan, tenki lori fila fali. 

.