“Australia Hatudu Mal-Vontade Rezolve CMATS”

.

Jornal Independente - Tersa-Feira, 04 Junho 2013 

Membru Senadu Fakuldade Sosial Politika (Fisipol) Universidade Nasional Timor Lorosa’e, Nolasco Mendes Konsidera Governu Australia durante ne’e la hatudu vontade diak ho Governu Timor-Leste hodi halo negosiasaun kona ba explorasaun mina no gas inklui tratadu lina fronteira tasi nian. 

Nu’udar estudante no sidadaun Timoroan, prinsipal liu mak kadoras mina no gas tenke mai Timor-leste, tamba bazeia ba akordu Certain Maritima Agreement in The Timor Sea (CMATS) ne’e fo benefisiu ba nasaun rua, Timor-Leste no Australia. 

Entaun justu liu Bayu Undang ba ona Darwin, Australia no Greater Sunrise tenke mai Timor-Leste, durante ne’e mos Australia supa barak liu ona, liuliu hanesan, Laminarai, Corallina, Bufallo no kakatua, Timor Leste la hetan osan centavos ida husi kampo hirak ne’e. 

Prespektivamente, estudante ne’e konsidera sei hasoru problema boot kona ba difini fronteira tasi nia ba Timor Leste, tanba antes Timor Leste hetan nia independensia, Australia dada an ona husi Tribunal Internasional no tratadu ONU nian kona ba lei tasi nian. 

“Australia arogansia duni tanba Bayu Undan benefisia ona ba sira nia povu, tanba ne’e mak sira koko atu hanesan ita,” hateten Nolasco Mendes iha Asosiasaun HAK Farol, Dili, segunda horseik. 

Antes ne’e, Primeiru Ministru Xanana Gusmao hateten, haruka ona karta ida ba Governu Australia hodi husu sira nia resposta kona ba Timor-Leste atu lori akordu CMATS wainhira la hetan solusaun iha prosesu arbitrazen. 

Iha parte seluk, Peskizador La’o Hamutuk, Charles Schener hateten kompania Woddside mak fo proposta hodi halo Foating iha tasi leten kona ba mina no gas iha Greater sunrise, laos Governu Australia. 

 “Hau hanoin ital abele koalia kona ba arogansia tanba nasaun rua ne’e ida-idak proteze hodi hasa’e sira nia rendimentu ekonomia husi mina nian, Australia iha interese makaas atu maximiza sira nia reseita ekonomia husi mina no gas iha Tasi Timor no Timor-Leste mos hanesan,” dehan Charles. 

 “Ami La’o Hmutuk iha tinan 2006-2007, wainhira governu rua negosia tratadu CMATS, ami sujere katak, tratadu ne’e la diak ba Timor-leste nia intrese tanba nia mandatu naruk liu, maibe infelizmente primeiru governu halo asina ho Australia,” nia hateten. 

Agora Governu Timor leste lori kazu ne’e ba arbitrazen, ami seidauk hare detailu kona ba sira nia akzuasaun, maibe wainhira CMATS nafatin iha Forsa Legal hanesan agora, laiha posiblidade atu lori kazu ba tribunal. Nia dehan, se iha prosesu la dun iha kooperativa diak, imposivel atu hetan solusaun justu. 

Nia dehan, prosesu iha mekanizmu rua iha relasaun internasional, ida kona ba tratadu Nasoens Unidas, kona ba lei tasi nian no ida seluk Tribunal Internasional ba justisa iha Holanda. Infelizmente, iha Marsu 2002, fulan rua molok Timor-leste nasaun nu’udar nasaun Independensia, Australia fo avizu katak, lakohi sai nu’udar membru ba Tribunal Internasional nomos nasaun membru tratadu ONU nian kona ba lei tasi nian. 

“Ami hanoin Povu Timor Leste no Povu Australia inklui Governu Timor Leste bele husu atu kansela sira nia avizu hodi sai husi lei tasi nian nomos Tribunal Internasional,” nia hateten. 

Diario ne’e tenta atu intervista embaixador Australia ba Timor-Leste , maibe la kohi fo nia komentariu, perguntas eskrita mos haruka tiha ona liu husi e-mail ba embaixada maibe to’o agora seidauk responde. 

.