Ameasa Fo Sansaun Ba Jornalista “TLPC Sei Halo Aprosimasaun Ho STL Nain”

.

Jornal Nacional Diario - Segunda-Feira, 03 Junho 2013 

Prezidenti Organizasaun Jornalista Timor Leste Press Club (TLPC) Jose Antonio Belo hateten katak, TLPC sei halo aprosiamsaun ho nain ba Media Suara Timor Lorosa’e (STL) relasiona ho ameasas ne’ebe mak media nain fo sai katak, sei fo sansaun ba Jornalista sira tuir konferensia nasional hodi transforma naran TLPC ba naran seluk. 

Prezidenti TLPC ne’e hateten, Media STL nain, Domingos Saldanha ne’ebe mak sai mos fundador ba organizasaun TLPC ne’e informa ona ba jornalista STL sira atu labele partisipa iha konferensia nasional ne’e tanba ho rajaun katak atu transforma naran TLPC ba naran seluk, tenki liu husi kongresu labele liu husi konferensia tanba fundador TLPC ne’e konsidera katak konferensia ne’e desizaun kiikoan ida. 

“Tuir ami rona katak, nia bandu, iramaun Domingus rasik bandu jornalista sira membru pres Club nian iha STL atu la bele partisipa iha konferensia ne’e, mai kraik atu fo sansaun, TLPC sei buka nafatin dalan halo diskusaun ba Sr. Saldanha para nia labele foti desizaun konaba ida ne’e, agora dadaun ne’e ita halo aprosimasaun, konferensia ita la troka naran,” dehan Prezidneti TLPC, Jose Belo ba Jornalista sira iha salaun enkontru Ministeriu Solidaridade Sosial (MSS) Caicoli, Dili, sabadu (1/6) hafoin haloa konferensia nasional TLPC nian ne’e. 

Nia hatutan, antes halao konferensia nasional, Prezidenti TLPC Jose Belo, rasik kontaktu ona ho fundador TLPC ne’ebe mak sain ain ba media STL nian, Domingos Saldanha iha nasaun Indonesia hodi husu nia komprensaun atu labele fo sansaun ba jornalista sira ne’ebe mak partisipa iha konferensia nasional ne’e. nia hatutan, wainhira media nain maka fo sansaun ba jornalista sira, relasiona ho partisipasaun jornalista nian iha konferensia nasional TLPC ne’e mak media nain viola ona konstituisaun Republika Demokratika Timor Leste (RDTL) no kodigu penal nian. 

“Hau telefone Sr. Domingos husu nia komprensaun atu labele fo desizaun ruma ba kolegas STL balun ne’ebe mai mai partisipa iha ne’e, tanba se karik foti desizaun kontra membru pres club ne’ebe mak partisipa konferensia ne’e ita viola ona konstituisaun da Republika i viola mos lei kodigu penal nian,” dehan Jose Belo. 

 Desizaun final husi konfrensista sira foti maka atu muda naran tenki liu husi kongresu extraordinariu ne’ebe mak sei halao iha loron 18 de janeiru 2014, tanba ne’e, Prezidenti TLPC husu ba fundador TLPC, Domingos Saldanha no membrus tomak atu partisipa iha kongresu refere hodi deskute klean liu tan kona ba transformasaun naran TLPC ba naran foun. 

 Ho partisipasaun husi membru tomak maka bele haforsa liu tan organizasaun TLPC iha futuru, tanba Press Club Jornalista sira nian. Nune’e mos, fundador TLPC, Lirio Fonseca liu husi nia intervensaun iha konferensia nasional hodi husu ba Prezidenti TLPC atu bele haree kona ba problema ne’e. 

 Fundador TLPC ne’e hatutan, se Media nain mak fo sansaun ba jornalista sira ne’ebe partisipa iha konferensia nasional ne’e, TPLPC tenki hare ba problema ne’e, tanba hahalok media nian ne’e kontra konstituisaun RDTL. 

,