Afonso de Jesus: “Labele Lamenta Deit Atuasaun PNTL”

.

Jornal Nacional Diario - Tersa-Feira, 11 Junho 2013 

Segundo Komandante Polisia nasional Timor Leste (PNTL), Komisariu Afonso de Jesus ba ema hotu atu labele koalia lamenta deit servisu PNTL, maibe tenki haree ho objetividade. 

“Ema lamenta ho atuasaun sira ne’e, maibe Polisia halo sira nian knaar ne’e tanba ema halo hela asaun krime ne’ebe ita labele lamenta deit, atu hateten karik iha prosesu PNTL sira sala maibe ita mos haree katak nia haree nia funsaun ida, se karik imi hatene hela nia hala’o nia funsaun, bele lamenta maibe labele halo impedementu ba ema ne’ebe mak hala’o hela nia kna’ar,” hateten Komisariu Afonso de Jesus ba Jornalista sira segunda (10/6) hodi responde ba kazu PNTL, Unidade Taks Force ne’ebe baku deputadu, Manuel Castro. 

Nia hatutan, iha lei mensiona katak bainhira membru PNTL halo atuasaun ba situasaun krime ka grave laiha ema ida atu intervein iha laran. Lei kodigu penal, artigo 145 hateten ofensas Integridade Fizika simples, iha alineia primeiru hateten,” 

Se mak ofende ema seluk nia isin ka saude sei hetan pena prizaun to’o tinan 3 ka multa, maibe iha aleina segundu hateten fali atu halo prosedimentu kriminal tenki hato’o keixa hanesan ema boot sira labele levanta deit maibe mos tenki halo keixa eskrita ba Ministeriu Kompotente, atu nune’e bele loke prosesu ital abele hanoin seit ita nian maibe hanoin mos ema seluk nian”. Nune’e mos iha lei kodigo penal artigo 243 hatete katak, 

“Obstrusaun ba autoridade Publiku signifika ema ne’ebe ho violensia ka ameasa grave hasoru funsionariu ka forsa militar, ajente Polisia nian la husik nia tatika aktu kona ba funsaun ka halo pratika halo hasoru nia dever sei hetan pena prijaun tinan 2 to’o 6”. 

Segundu Komandate PNTL ne’e mos akresenta, kona ba kazu ne’e, Sekretariu estadu Seguransa, Francisco Guterres ba ona iha komando jeral PTNL hodi hatun ona despaisu hodi halo verifikasaun hodi hatene lolos involvimentu Polisia nian no mos parte politku nian, no oras ne’e dadaun porsesu investigasaun lao hela. 

“Oras ne’e dadaun membru PNTL ne’ebe deskonfia baku deputadu Manuel Castro ne’e hala’o hela nia kna’ar hanesan bai-bain hodi hein prosesu investigasaun to’o ikus mai mak iha faktus ne’ebe konkretu duni hodi kondena membru PNTL ne’e entaun tenki halo tuir,” dehan Afonso. 

 Iha parte seluk, tuir Deputadu FRETILIN, Manuel Castro ne’ebe sai vitima ba kazu ne’e hateten, sira sei la nonok ba kazu ne’e hodi nafatin eziji justisa. 

“Maske sira defende an maibe lei mak sei la’o maibe ami FRETILIN nia deklarasaun sei la’o nafatin hodi buka nia problema ne’e to’o nia abut,” dehan Manuel Castro. 

 Nune’e mos Prezidenti Komisaun G Parlamentu Nasional, ne’ebe trata kona ba Etika Deputado, Mateus de Jesus hateten, iha momentu akontesementu ne’e haree katak Policia halo atuasaun tanba lei, oraguan soberania sira mos bazeia ba lei livre tranjitu, signifika iha fatin ne’ebe de’it tenke tama ba haree, maibe problema ne’e tenke haree didiak, dala ruma Policia nian atuasaun ba problema kriminal mos los tanba kontra direitus humanus, maibe sra mos hakarak atu defende direitus humanus ema seluk nian. 

Membru Parlamentu Nasional husi Bancada CNRT ne’e mos rekoinese katak, iha parte seluk deputadu sira produs tiha lei, maibe sira mos la dun interese ba lei ne’e, hodi hakat liu tiha lei ne’e, maibe iha parte seluk mos deputadu sira livre husi tranjito ne’ebe deputadu iha direitu atu defende ema seluk nia direitu. 

.