“Advogadu Gil Alves Resposta Ona Rekursu MP”

.

Jornal Timor Post - Sabadu, 01 Junho 2013 

Advogadu Jose Manuel Gomes Guterres ne’ebe fo asistensia legal ba Eis Ministru Turismu Comersiu Industria Gil da Costa Alves ba kazu krime burla agravadu akuza husi Ministeriu Publiku, hatama ona sira nia resposta ba motivacao rekursu ne’ebe Ministeriu Publiku aprezenta ba Tribunal. 

Advogadu Jose Manuel haktuir hafoin Tribunal Distrital Dili hasai desizaun prmeiru instalasaun ba nia kliente, liu tiha loron 20 nia laran, nia simu notifikasaun husi Tribunal Rekursu hodi husu ba defeza hakarak aprezenta sira nia resposta ba motivacao rekursu refere. 

Nune’e parte defeza kumpri hodi prepara resposta no hatama ona iha Tribunal rekursu, no sira hein desizaun saida deit mak Tribunal Rekursu sei desidi ba prosesu refere. 

“Ami hatama ona resposta ba Tribunal rekursu relasiona ba motivacao rekursu ne’ebe aprejenta husi Ministeriu Publiku,” dehan nia ba Timor Post, sesta (31/5) iha Tribunal rekursu, Caikoli. 

Entertantu, Tribunal rekursu liu husi seksaun prosesu iha loron 25 Abril 2013 registu ona motivacao rekursu ne’ebe Ministeriu Publiku hatama, hodi kontra desizaun Tribunal Primeira instansia ne’ebe fo liberdade kondisional ba erguido Gil da Costa Alves ho arguido Henrique ne’ebe Ministeriu Publiku akuza komete krime burla agravadu, prosesu rekursu ne’e registu iha Tribunal rekursu tuir data ne’ebe mensiona ho numeru entrada ka regista maka hanesan 36/CO/2013/TR. 

Alende ne’e, iha 21 Marsu 2013, Tribunal Distrital Dili (TDD) hatun akordaun hodi desidi fo absolvisaun ba arguidu Gil Alves no Henrique Carlos Alves husi krime Burla Agravadu, pekulatu no abuzu poder, relasiona ho utilizasaun orsamentu durante tempu kampania partidu ASDT iha tinan 2012. 

Tribunal konsidera akuzasaun Ministeriu Publiku ba krime sra kona-ba burla agravadu iha artigu 267, krime pekulatu iha artigu 295, no abuzu poder iha artigu 297 kodigu penal hotu-hotu probvadu, tanba la prinexe rekijitu iha artigu sira refere. 

Tribunal konsidera katak, krime burla agravadu, la provadu tanba arguidu sira nia hahalok la hamosu prejuizu ba Partidu ASDT atual hodi tama iha situasuan ekonomia difisil. 

Tuir mai, Tribunal konsidera krime pekulatu la provadu tanba arguido nain rua la’os hanesan funsionariu publiku no orsamentu refere laos utiliza ba privadu hodi halo riku aan maibe utiliza ba atividade kampania partidu ASDT. 

Ba krime abuzu poder, Tribunal mos konsidera la provadu tanba momentu ne’ebe seidauk iha desizaun tranzitu em julgadu husi Tribunal Rekursu, relasiona ho estrutura foun b apozisaun husi Sekretariu jeral partidu ASDT no Prezidenti ASDT hodi ezekuta orsamentu ba atividade kampania partidu ASDT. 

 Aleiende ne’e, bazeia ba lei internal ASDT ne’ebe defini katak, wainhira prezidenti Partidu mate, automatikamente nia vice maka assume diretamente kargu nuudar prezidenti provizoriu partidu nian. 

.