“Xanana Husu Kria Konsellu Distrital Veteranus”

.

Jornal Independente - Kinta-Feira, 09 Maiu 2013 

Primeiru Ministru Kay Rala Xanana Gusmao husu ba veteranus iha kada Distritu atu organiza aan hodi kria konsellu Distrital veteranu. 

PM Xanana dehan, kriasaun konsellu ne’e atu rezolve problema sira ne’ebe mak veteranus sira enfrenta. Xanana htao’o kestaun ne’e ba PR Taur bazeia ba preokupasaun ne’ebe nia hetan durante halo konsultasaun publiku kona-ba Kamara Munisipiu iha Distritu. 

“Veteranu sira mai informa problema, tanba ne’e hau informa ba Prezidenti Republika katak, tuir distritu ida-idak, hau soe hela mensajen atu organiza an hodi kria konsellu Distrital veteranus hodi bele haree problema hirak ne’e envez mai hotu nasional,” dehan xanana hafoin enkontru regular ho PR Taur iha Palasiu Prezidenti Ai-tarak laran, Dili (7/5). 

 Ida ne’e, tuir Xanana atu afasil veteranus sira hodi konese malu, tamba maske uluk servisu hamutuk maibe dala ruma haluha tiha naran. “Ital abele konese ema hotu, tanba ne’e ita kria sistema ne’e para rezolve husi distritu mak sa’e mai iha nasional,” hateten Xanana. 

Aliende ne’e, xanana informa ba PR kona ba vizita ba Thailandia no esnkontru ho deputy Sekretariu Jeneral Nasoens Unidas hodi koalia kona-ba situasaun Timor Leste no advisor husi Nasoens Unidas, no informa divulgasaun problema desentralizasaun ne’ebe lai iha Distritu. 

Entertantu, tuir planu selebrasaun loron proklamasaun Independensia 28 Novembru tinan ne’e sei realiza iha kraras, Distritu Viqueque. PM xanana informa mos kestaun ne’e ba PR Taur iha enkontru semanal, Kuarta (8/5). 

“Hau mos informa hela ba prezidenti Republika katak, ekipa Ministerial ba tiha ona kraras, Viqueque hodi prepara loron 28 Novembru ne’ebe halao iha kraras kompleta tinan 30,” hateten PM. Xanana dehan, ezijensia hodi halao festa proklamasaun iha kraras tanba iha tinan 30 liu ba kotuk, povu no luta nain barak mak lakon nia vida husi invazor sira.

.