“Xanana ‘Hamoe’ Intelektuais’ Viqueque”

.

Jornal Timor Post - Kuarta-Feira, 15 Maiu 2013
,

Primeiru Ministru (PM) Kay Rala xanana Gusmao hamoe relatoriu ne’ebe mam intelektuais Viqueque oan sira aprezenta iha dialogu divulgasaun planu no programa desentralizasaun kamara Munisipiu, tanba relatoriu refere la identifika detallu rekursu naturais no humanu iha Distritu refere. 

“Imi la identifika loloos imi nia rekursu naturais no umanu, Relatoriu sira ne’ebe mak imi aprejenta, ne’e jeral de’it, signifika imi rasik mos la preparadu,” hateten Xanana liu husi nia dialogu ho komunidade Viqueque oan sira, Tersa (14/5) iha salaun administrasaun Distritu Viqueque. 

Nia hatutan, se la konese didiak rekursu sira ne’e, sei implementa munisipiu iha 2071. “Se imi la priense kriteriu sira ne’e, hau tan la konese liu, tanba ne’e, hau mai doko imi, hau mai sadik imi no mai fera imi nia kakutak atu hanoin,” dehan Xanana. 

PM Xanana informa liu tan katak, Viqueque oan sira hakarak simu munisipiu tenki halakon lia fuan “o se, hau se”. 

“Intelektual sira tenki hatene didiak ninia potensia, dokumentu sira ne’e seidauk perkore potensia rua ne’ebe importante iha Viqueque, hau hatene ita boot sira hakerek dokumentus ne’e la iha konsentrasaun,” Xanana dehan. 

Tanba ne’e, tuir nia, intelektuais Viqueque oan sira, hanesan xefe Governu, nia la kohi halo moe Viqueque oan sira, maibe nia husu presiza fo atensaun didiak par abele halo relatoriu ne’e ho didiak no tenki hakerek ho kualidade. 

.