“Uza Sala Kareta Estadu, Kuidadu Ho Espiaun KAK!!!”

.

Jornal Independente - Kinta-Feira, 09 Maiu 2013 

Komisaun Anti Korupsaun (KAK) monta ona ninia ema hodi tau matan ba membru governu no funsionariu publiku sira ne’ebe halo irregularidade, liu-liu uza viatura estadu ba interese privadu. 

Adjuntu Komisaun KAK ba asuntu prevensaun, Manuel Bucar hateten, KAK monta ona ninia ema hodi foti dadus membru governu no funsionariu publiku sira ne’ebe uza sala kareta estadu. 

“Ema sira ne’e imi la konese, sira tuur iha ne’eba ho kamera hodi hasai filmajen,” informa nia bainhira partisipa iha WorkShop ho Funsionariu Sekretariu Estadu Igualidade Jeneru (SEPI), iha Tower, fatuhada, Dili, (8/5). 

Nia dehan, bainhira hetan ona dadus ne’e, sei bolu ema ne’ebe komete hodi husu atu labele repete tan ninia hahalok. 

Ida ne’e, Bucar dehan, hanesan asaun ida atu halo prevensaun ba aktu korupsaun iha TL. Bainhira ema ne’e kontinua nafatin uza sala kareta estadu, nia dehan, nia parte sei halo investigasaun klean hodi bele prosesa tuir dalan justisa. 

Iha fatin hanesan, Inspetor Jeral estadu, Francisco Carvalho dehan, nia parte la hein deit keixa, maibe bainhira lee informasuan husi media komunikasaun katak funsionariu balun uza sala kareta Estadu, sei halo investigasaun. 

 Bainhira identifika duni aktu ne’e, nia dehan, nia parte sei relata ba instituisaun kompotente atu prosesa. 

.