Uma Lima Kada Suku: “BTK Hari’i Iha Rai Fasil Inundasaun”

.

Jornal Nacional Diario - Segunda-Feira, 13 Maiu 2013 

Komisaun E ne’ebe trata ba asuntu infraestrutura, Transportes no Komunikasaun iha Parlamentu Nasional, konsidera rezultadu servisu Kompania Badan Tunggal Karya (BTK), sei lori dezastre boot ba komunidade sira. 

Tamba uma lima ba kada Aldeia ne’ebe mak kompania BTK ne’e hari’i iha Distritu Covalima laiha kualidade no harii iha fatin ne’ebe mak la seguru husi dezastre naturais. 

 Problema ne’e komisaun E identifika rasik, wainhira hala’o fiskalizasaun ba Konstrusaun Projeitu Dezenvolvimentu Desentralziasaun (PDDI-PDDII), iha Distritu Covalima, ne’ebe mak harii uma lima kada aldeia ba vuleravel ne’ebe mak responsabliza husi kompania BTK. 

Iha fiskalizasaun ne’e, Deputadu sira hakilar director kompania sira to’o nia kakorok maran hotu, tanba projeitu PDDI-PDDII ne’ebe mak hala’o iha Distritu Covalima ho nia sub Distritu 7 laiha kualidade no balun abandona, i deputadu sira konsidera katak, konstrusaun uma 5 ba kada aldeia ba vulneravel ne’ebe mak ka’er husi kompania BTK ne’e, sei lalori vida seguru ba povu, tamba uma nee sira harii iha fatin rai inundasaun wainhira tempu udan. 

Konstrusaun uma 5 ba kada Aldeia iha Distritu Covalima ho total 514, uma ho nia tipu oin rua mak hanesan 20X20 no 50X20 ne’ebe kaer husi kompania BTK hodi halao konstrusaun ne’e iha suku lalawa, Sub Distritu Tilomar no mos iha Aldeia Sanfuk, Suku Kamanasa, Sub Distritu Suai Vila, Distritu Covalima. Deputadu Ososrio Florindo membru Komisaun E ne’ebe bat rata asuntu infra-estrutura, Transporte no komunikasaun ne’e hateten katak, konstrusaun uma 5 ba kada aldeia ne’e, fob a vulneravel sira atu hela. 

Maibe hare ba konstrusaun uma ne’e husi BTK, deputadu Osorio la mentavel tebe-tebes ba rezultadu servisu husi Kompania BTK, tamba sira bou hamutuk rai isin mak harii uma iha leten, nune’e iha tempu udan rai sei halai hotu no uma sira ne’e sei lulun hotu ba rai okos. 

Osorio Florindo hatutan, wainhira sira ba halo fiskalizasaun to’o fatin refere, hodi hare diretamente konstrusaun uma ne’e katak, rai nain ne’ebe mak oferse nia rain ne’e sira nia familia id abele hetan uma 7 to’o 8, la tuir ona lista ne’ebe dehan kada ema ida hetan uma ida. 

Iha fatin hanesan, Deputadu Albina Marcal Freitas, membru komisaun ne’e husu ba kompania BTK atu halo planu ida diak, hodi halo protesaun ba uma sira ne’ebe mak harii tiha ona, tanba wainhira la halo nia protesaun hodi ateru ka halo bee dalan, maka wainhira udan mai sei lori hotu uma komunidade nee ba kuak ida. Tuir nia, loloos antes halo uma ne’e, kompania BTK halo uluk bee dalan hodi nune’e labele afeita ba uma refere. 

Nune’e mos, deputadu husi Bancada CNRT Pedro Martires husu ba BTK atu halo konstrusaun uma ho kualidade no labele halo arbiru deit. “Hau husu ba kompania BTK atu halo konstrusaun uma ne’e ho kualidade diak, labele tidin ba deit iha rai leten, ho nia fundasi badak liu, wainhira udan boot bee bele tama uma laran, tanba rai ne’e tetuk no rai isin tan,” dehan Pedro Martires. 

Prezidenti Komisaun E ne’e esplika katak, ninia maluk deputadu sira hakilar responsavel BTK nian, tanba haree ba realidade iha terenu ne’e nota katak, knstrusaun uma ne’ebe mak harii ba vulneravel sira ne’e laiha duni kualidade. To’o notisia nee fo sai seidauk hetan klarifikasaun husi director komapnia BTK. 

.