“Trabalador Brother Block Greve”

.

Jornal Independente - Tersa-Feira, 14 Maiu 2013 

Trabalador nain 50 ne’ebe servisu iha kompania Brother Block halo asaun Greve hasoru kompania ne’e tanba konsidera kompania halo kontratu servisu ne’ebe la los. 

Segunda, (13/5), trabalador hirak ne’e hetan akompania husi Forum Trabalador Maubere (Foram) halo asaun greve hodi eiziji sira nia direitu. 

Trabalador ida Agusto Amaral dehan, nia sevisu iha kompania ne’e dezde tinan 2011, maibe to’o ohin loron nunka iha kontratu servisu eskrita. 

Nia dehan, razaun halo greve tanba durante ne’e kompania seidauk fo resposta ba sira nia ezizensia kona-ba osan over-time, lisensa annual no kontratu servisu, inklui salariu minimu. “Se kompania la prepara kondisaun diak oinsa ami bele hala’o serviso diak, tanba ne’e maka ohin ami halo greve,” dehan nia iha edifisiu kompania Brodehr Block, Fomentu Dili (13/5). 

 Nia dehan, sei kontinua halo greve to’o hetan resposta ne’ebe diak husi kompania. Iha fatin hanesan Brigada FORAM Akino da Silva hateten, prosesu greve ne’e trabalhador sira mak hasai deisjaun no foram akompania deit hodi halo negosiasaun ho kompania. 

Bainhira la iha konkordansia, nia dehan, trabaldor sira desidi kontinua halao greve to’o fulan 6 resin hodi hein resposta positivu. 

 “Ohin loron ami halo greve ho ami nia rajaun katak, kontratu ne’e mak la loos, trabalador sira durante servisu tinan hat ona, maibe advogadu kompania mai kontratu dehan trabalador sira ne’e buruh lepas,” hateten Akino. 

Akino hateten, salariu minimu mak U$115 kada fulan, maibe ida ne’e faze percobaan durante fulan tolu, depois ida ne’e kuandu produsaun aumenta tenki hasa’e ona salariu, se la aumenta nia dehan, ida ne’e violasaun boot hasoru lei laboral nian no mos oho Trabaldor sira. 

Entertantu, formulasaun husi parte SEPFOPE kona ba salariu minimu katak, trabalador ida tenki hetan U$5.20 kada loron. 

.