Sosializasaun CM Iha Dili Adia Ba 25 maiu “PM Xanana: Intelektuais Dili Labele Hanoin De’it Osan”

.

Jornal Nacional Diario - Tersa, 07 Maiu 2013 

Distritu Dili nu’udar mos Kapital ba nasaun Timor Leste, ne’ebe tuir loloos atu simu no rona sosializasaun Camara Municipio (CM) ne’ebe hato’o husi Primeiru Ministru Kay Rala Xanana Gusmao iha Segunda (6/5) horsik, maibe tan deit laiha partisipasaun husi intelektuais Dili oan no seitor Privadu, programa sosialziasaun ne’e obrigadu adia ba 25 maiu 2013. 

Ambiente iha Distritu Dili ne’ebe mak akontese dadaun ne’e la hanesan ho Distritu sira seluk ne’ebe mak Primeiru Ministru Kay Rala xanana Gusmao hala’o ona sosializasaun Camara Municipio ba. Se lembra fila fali, Distritu sira ne’ebe mak Primeiru Ministru ba tiha ona, hanesan Oecusse, Bobonaro, Covalima, Manufahi, Ainaro, Aileu, Liquica no ermera, intelektual tantu husi estadu no Igreija inklui sosiedade sivil no komunidade sira iha Distritu hirak ne’e preparadu ona no antusiaismu tebes hodi partisipa maximu durante sosializasaun hala’o iha sira nia Distritu. 

Maibe Distritu Dili ne’ebe mak tuir loloos sai mata dalan ba Distritu sira ne’ebe dook husi kapital nasaun ne’e, akontese oin seluk fali. Wainhira Xefe Governu hamutuk ho membru Governu balun hakat ba fatin atu halo sosializasaun camara Munisipiu ne’ebe desidi iha Gimnazio (Eis GMT) Dili ne’e, haree ba laiha intelektual Dili nian ida mak hatudu sra nia oin, maibe iha deit estudantes Pre-Sekundaria, Sekundaria no Universitariu oan sira balun, ho mos ferik aktuas sira balun maka nakonu hela iha salaun gemnazio. 

Ho ida ne’e, programa sosializasaun Camara Municipio ne’ebe ajenda ba loron rua Segunda-Tersa feira (6-7 Maiu) iha Distritu Dili ne’e, Primeiru Ministru xanana Gusmao adia fali ba 25 Maiu 2013. Primeiru Ministru Xanana Gusmao ho hirus hakilar makaas katak, Distritu Dili la hanesan ho Distritu sira seluk, ne’ebe nia vizita ona, povu ho antusiazmu maka’as tebes hodi simu no rona programa munisipiu ne’e, tanba ne’e susar tebes atu halo munisipiu iha Dili. 

 “Hau la’o ona ba Distritu lubun ida, povu ho antusiazmu maka’as atu simu Camara Municipiu ne’e, liu-liu iha Distritu Oecusse ne’ebe dook tebes, maibe Distritu Dili ne’ebe hanesan mos kapital Dili ema lubun oan ida de’it, hau vontade laiha kedas atu halo Municipiu iha Kapital Dili,” ho dezanimu ne’e, PM Xanana Gusmao hakilar ho lian maka’as iha salaun GMT nia laran. Xeffi Governu ne’e salienta katak, parese ema balun hanoin katak, husik ba nia ba hakilar mesak ne’eba, maibe sira la hatene katak Dili ne’e kapital nasaun Timor Leste ne’ebe sei sabraut hela. 

Primeiru Ministru mos husu ba matenek nain sira iha Distritu Dili nian, labele hanoin deit mak osan. 

“Hau husu ba matenek nain sira iha kapital Dili ne’e, atu tur hamutuk hodi halo planu, hodi dezenvolve kapital Dili, labele tur hanoin deit atu manan osan, hau koalia hanesan ne’e tamba ita konese malu, hau hatene se mak Prezidenti, se mak Vice Prezidenti no Vise sira seluk tan,” Xanana haklaken. 

Xanana mos husu matenek nain sira atu kontribui ba povu nia hanoin hodi nune’e Xina sira labele dumina fali Timroan sira iha kapital Dili. 

“Organiza an ba, hasoru malu ba, koalia ba malu, se la’e Shing-Zhang mak sa’e hela ba leten de’it, se lae ita temi komersiu ne’e atu halo saida, industria ne’e atu halo saida, tanba ita nia risku boot mak ita iha osan, osan laiha karik ita moe ita oan ita bah usu, dala ruma U$20 dolar sira fo U$10 dolar, ita agradese no kontenti ona, maibe ita iha osan ita la preokupa ona,” Xanana fundamenta. Xanana dehan hikas se iha Dili ne’e laiha Kamara Munisipiu, Governu Sentral mak boot nafatin. 

“Iha Dili ne’e Governu sentral atu sai saida, no municipio iha Dili ne’e atu sai halo nusa, la’e so’e hela hanesan ne’e, Governu sentral mak boot nafatin ho nia Miss sira ne’e hotu, Camara Municipio ne’e laos atu haruka Miss-Miss sira ne’ebe mak kaben ho governu sira mak atu tun fali ba kraik,” hateten Xanana Gusmao. 

Nota:  Xanana Gusmão não devia de usar estes termos RACISTAS quando se refere à população chinesa. É inadmissível num primeiro-ministro falar dos timorenses com origem chinesa usando termos como, " ...se la’e Shing-Zhangmak sa’e hela ba leten de’it...". Um termo ofensivo para a população chinesa, um insulto! Vá...É assim que vamos criar a unidade e a paz entre os timorenses? Por amor de Deus, ajam de acordo com com os cargos de ocupam, ou isto é uma República das Bananas???

.