“Ro Patrolha Maritima Aat”

.

Jornal Nacional Diario - Kinta-Feira, 09 Maiu 2013 

Reprejetante Povu iha uma fukun Parlamentu Nasional (PN) kestiaona maka’as Ro Patrolha rua ba Forsa Maritima ne’ebe mak to’o ohin loron kontinua aat. 

“Ami lamenta tebes ita nia EStadu ida ne’e sosa ro patrolha rua depois la funsiona uluk kedas ami kestiaona,” dehan Vice Xefe bancada FRETILIN, Francisco Miranda Branco ba JNDiario, KUarta (8/5) iha Parlamentu Nasional. Francisco Branco la menta mos prosesu sosa ro refere, ne’ebe sosa liu husi Single source, la liu husi konkursu publiku, inklui antes sosa ro refere la liu husi estudu ne’e mak sosa, tanba ne’e osan barak ke gasta Ro ne’e laiha rejultadu diak. 

“Ita gasta osan barak sosa ro patrolhu rua maibe lafunsiona ita lakon nafatin ita nia riku soin iha tasi neeba,” haktuir deputadu Branco. 

Iha oportunidade ne’e nia parte preokupa Portu Hera ne’ebe mak to’o ohin loron kontinua at, maibe to’o ohin loron seidauk hadia para Ro atraka iha fatin ne’e. 

Hanesan mos Ponte kais Hera, ita hanesan tama tiha ona iha situasuan ida ne’ebe husik hela deit buat sira ne’e,” lamenta Vice Xefi Bancada FRETILIN Francisco Branco. 

Ba situasaun ne’e hotu ejiji Governu atu toma atensaun ba kestaun nebe refere, hodi osan ne’ebe Estado gasta benefisia duni ba povu no rai ida ne’e. 

“Hau hanoin Parlamentu Nasional orgaun ne’ebe fiskaliza Governu ita presiza hanoin hamutuk atu salva guarda osan ne’ebe Estadu ninian atu husu responsablidade ba sira ne’ebe hasai desizaun sira ne’e,” haklaken Deputadu Branco. 

 Entertantu, iha fatin hanesan kestaun ne’ebe refere prezidenti Komisaun B Parlamentu Nasional (PN) trata ba asuntu, Maria Lourdes Martins de Sousa Bessa rekonhese Ro rua patrolha at to’o agora la uja ne’e koalia dala barak ona komisaun koalia ho Governu maibe laiha resposta. 

“Ida ne’e kestaun antigu, laos foin agora i iha komisaun rasik ami levanta bei-beik, prosesu manutensaun laiha, ne’ebe ami kontinua ejiji ho autoridade para hare ba ida ne’e,” haktuir deputada Bessa. 

Nia deklara, maske estadu hasia osan barak sosa ro ikus mai at fila fali, tanba laiha planu ida ke diak antes sosa Ro ne’e. 

“Prosesu ne’e tenke lao diak, ita kuandu hola ro ita tenke preve kedas Ro nia fatin, manutensaun, ema ne’ebe mak atu opera ro, buat sira ne’e para it abele lao ba oin, buat sira ne’e mak falta,” afirma deputada Bessa. Bessa akresenta tan, kestaun refere komisaun B husu beibeik ona ba Governu kompotente atu tau atensaun ba asuntu ne’e, maibe to’o ohin loron laiha resposta. 

 Entertantu, to’o notisia ne’e publika ona maibe seidauk halo konfirmasaun ho parte Ministeriu Kompotente hodi kompleta asuntu refere. 

.