Prosesu Sosa Ai-Moruk Konfuzaun”

.

Jornal Independente - Kuarta-Feira, 15 Maiu 2013 

Ministru Saude Sergio Lobo deskonfia uza nia pozisaun hodi hetan benefisiu husi projeitu governu. Iha tersa (14/5), liu husi sesaun plenaria, deputadu sira iha Parlamentu Nasional (PN) halo akuzasaun hasoru Ministeriu saude tanba konsidera fo projeitu ba ninia kompania, Istana Farmacia, hodi importa ai-moruk. 

Xefe Bancada PD, Maria Lourdes M’Bessa husu ba Ministru saude atu esplika kontratu ba sosa ai-moruk. M’Bessa sente konfuzaun mos tanba saida mak MS tenke envolve Istana Farmacia iha projeitu sosa-aimoruk. Bazeia ba informasaun ne’ebe nia hetan katak, kontratu ne’e asina iha loron ida de’it, osan ba kontratu primeiru ne’e kuaze milaun U$700 no kontratu segundu mak halo ho Istana Farmacia. 

“Ami nia duvidas mak ahfoin ai-moruk sira ne’e tama mai, la kleur deit hotu ona, tanba ne’e ami hakarak hetan esplikasaun kona ba kontratu rua ne’e,” nia hateten. Hatan ba kestaun ne’e, Ministru Lobo rejeita akuzasaun husi deputadu sira. 

Nia dehan, molok sai nuudar membru governu nia sain ain ba kompania Istana Farmacia, maibe hafoin sai Ministru nia rezigna aan. 

 “Hau nia kompania la iha ida, ba cek tok iha Ministeriu Justica, hau nia kompania iha? 

Tanba ne’e mak hau sente la menta uituan kona ba informasaun husi ita nia deputadu sira,” nia hateten. 

Akuzasaun ba Ministru Saude ne’e mosu tanba ai-moruk iha ospital nasional menus maibe iha farmacia balun ai-moruk kumpletu. Entertantu, deputada husi bancada FRETILIN Ilda da Concecao lamenta ho mediku sira iha Hospital ne’ebe fo deit reseita ba pasiente sira hodi ba sosa ai-moruk iha klinika privadu. 

“Ita nia pasiente barak mak hato’o sira nia preokupasaun kona ba reseita husi ospital nasional tanba deit ai-moruk laiha,” dehan nia. Ho situasaun ne’e, nia husu ba Ministeriu Saude tenke esforsu maka’as atu kontrola mediku sira iha HNGV hodi fo atensaun seriu ba distritbuisaun ai-moruk ba ospital iha teritoriu tomak. 

 Kona ba kestaun ne’e, Ministru Lobo dehan, nia seidauk simu informasaun ruma no fo razaun katak konstituisaun RDTL garante saude gratuitu ba povu tomak. “

Maibe, karik iha duni mediku ida halo hanesan ne’e, hau husu ba pasiente sira atu lori reseita mai hau, hodi bele halo prosesu ba mediku ne’e, pasiente sira labele tauk atu fo informasaun loos nia mai hau,” dehan Lobo. 

Nune’e, enfermeiru ida husi Australiana ne’ebe halao servisu iha ONG ne’ebe haree ba asuntu saude hateten, iha semana kotuk lori pasiente nain 3 hodi ba hetan tratamentu orijenti iha Ospital Baucau maibe laiha ai-moruk atu fob a pasiente sira ne’e. 

.