“Primeiru Ministru Xanana Gusmao Stres Ho S1-S2”

.

Jornal Nacional Diario - Kinta-Feira, 02 Maiu 2013 

Primeiru Ministru (PM) Kay Rala Xanana Gusmao sente Stres ho Universidade balun ne’ebe produz S1-S2 ho durasaun tempu apredizajen (semester-red), ne’ebe badak. 

 “Hau hakarak labarik sira sai matenek, la’os eskola fulan rua tas ona hodi kria ita nia S1 no S2 barak, Nu’udar Xefe do Governu, hau mak stress,” dehan Primeiru Ministru (PM) Kay Rala Xanana Gusmao hafoin fila husi vizita traballu husi Tahilandia, ba Jornalista sira iha Aeroportu Internasional Prezidenti Nicolau Lobato Comoro, Dili, Tersa (30/4), wainhira husu nia komentariu konaba loron mundial trabalador ne’ebe monu iha )1/5). 

 “Koalia kona ba trabalador ne’e ita halo saida, tanba iha Portugal, espanha, Grecia no Sidney, trabalador sira loro-loron deit ba protesta dehan sira servisu laiha, hau haree ida ne’e, hau dehan pares eke hau la hanoin sala, tanba iha ita nia sosiedade hau temi no hakilar kona-ba Universidade sira, ema balun hanoin katak hau hakarak taka, maibe laos ida ne’e,” hateten xanana Gusmao. 

 Xefi Governu ne’e esplika katak, iha nasaun Dezenvolvidu sira ne’ebe ukun an tiha ona tinan 15-24 ona mos, sei iha 26 Milloens mak servisu laiha. Relatoriu husi banku Mundial mos hateten katak, to’o oras ne’e 75 miloens joven iha mundu tomak mak servisu laiha, liu-liu iha nasaun sira ne’ebe la’os dezenvolvidu iha 262 miloens joven mak laiha servisu,” Xanana afirma. 

Xefe Governu ne’e mos dehan tan katak, husu ba estudante Timor oan sira hotu atu aprende Portugues, tanba balun kestiaona katak, tanbasa mak lian portugues ne’e sai fali lian inan iha nasaun ida ne’e. 

Nia dehan, membru governu sira deit mos dala ruma koalia portugues, bahasa mos tama, Cines tama, Arigato tama i lian hotu-hotu kahor hamutuk. 

“Tinan ida ne’e hau dehan ba Ministru edukasaun, atu para lai ho eskola sira ne’ebe referensia, maibe hau dehan laos atu taka, maibe ita tenki halo ma eskola profesionais, lae ita mate hotu,” sublinha nia. Xefe Governu mos husu ba joben sira atu tur hakmatek, labele oho malu arbiru iha fatin-fatin hanesan ikus-ikus ne’e mosu iha Dili laran no labele hemu tua, governu sei buka dalan diak ida ba joven sira hodi sira mos moris kontenti. 

 “Hau fo apelu ba trabaladores sira katak, ita tenki badinar no tenki kosar, dala ruma baleta ida ita atu halo mos iha Audian ne’eba mos, nain rua kaer bosok, nain lima tuur fuma, ida ne’e bele hali ita mate hotu, ita haree tok ponte Comoro, ida ne’e mak ita husik ita nia ema kaer, mota tu’un mai ita ba hili besi sira ne’e iha Atauru,” dehan PM Xanana. 

Nia mos hatutan katak, estudante sira ne’ebe oras ne’e dadaun estuda hela iha rai liur atu aproveita didiak oportunidade ne’ebe iha hodi estuda, atu nune’e bele lori buat foun mai nasaun Timor Leste, laso atu ba kria fali problema iha ema nia rain no loris fali situasaun ida ne’e mai rai ida ne’e. 

“Hau haree hau triste liu, tanba estudante barak ne’ebe ba iha Indonesia tanba familia rasik, ho susar barak iha rai laran ne’e, mak inan aman haruka oan sira ba eskola,” dehan nia. 

.