“Primeira Dama Vizita Labarik Mal Nutrisaun”

.

Jornal Nacional Diario - Tersa-Feira, 14 Maiu 2013 

Primeira Dama Timor-Leste, Isabel Ferreira, Segunda (13/5), Vizita Organizasaun Non Govermental (ONG) Hamutuk Ita Ajuda Malu (HIAM-Health) ne’ebe mak durante ne’e fo formasaun konaba aihan ne’ebe diak, eduka no haree labarik mal nutrisaun sira. 

“Vizita iha ne’e atu konese organizasaun ne’e diak liu tan, organizasaun ne’e nia serviso no hanesan ohin ita hotu akompania kona ba organizasaun ne’e nia serviso, liu-liu sira fo apoiu ba familia ou inan no oan sira ne’ebe hetan problema mal nutrisaun,” dehan primeira Dama ba Jornalista sira iha edifisiu HIAM-Health Delta, Dili, hafoin vizita ba servisu organizasaun ne’e nian. 

Nia hatutan tan katak, labarik kikoan sira ne’ebe organizasaun ne’e halao reabilitasaun balun to’o tinan ida no tinan rua liu ona, maibe seidauk lao tanba mal nutrisaun menus, nune’e labarik sira ne’e nia isin todan menus liu. Organizasaun ne’e mos fasilita inan-aman sira inklui mos joven sira ne’ebe mak iha interese atu tuir treinamentu iha area Agrikultura nian hanesan kuda modo no seluk tan. 

“Sora mos hanorin familia sira ne’e oinsa atu iha kintal wainhira iha sira nia uma rohan bele kuda ho ai han ka produtu lokal ne’ebe ke ita iha, hanesan kuda modo, tomante, liss, repoilo, alfase, ai manas, Marungi, no selu-seluk tan atu nune’e bele aumenta vitamina,” dehan nia. 

Tuir Primeira Dama, maske servisu ne’e hala’o kleur ona maibe seidauk hetan ajudus ruma husi governu kona ba finanseiru, maibe organizasaun ne’e iha inisiativa rasik buka finanseiru husi duadores internasional sira no antes ne’e hetan mos apoiu husi Eis Prezidenti da Republika Jose Ramos Horta , durante tinan 2 nia laran, hahu husi tinan 2010 to’o 2012.

,