PNTL La Konkorda Promosaun Diviza “Maijen Lere Husu Lori Ba Tribunal”

.

Jornal Nacional Diario - Kinta-Feira, 09 Maiu 2013 

Xefi Estadu das FALINTIL-Forsa Defesa Timor Leste (F-FDTL) Maijor jeneral (Maijen) Lere Anan Timur husu ba membru Polisia Nasional Timor Leste (PNTL) , balun ne’ebe halo petisaun tanba la konkorda ho promosaun diviza foin lalais ne’e diak liu mak lori deit ba tribunal, nune’e, bele hetan solusaun ne’ebe diak. 

Karta petisaun ne’e membru PNTL balun halo ona no intrega ona ba Primeiru Ministru (PM) Kay rala Xanana Gusmao ne’ebe mak assume mos pasta nu’udar Ministru Defeza no Seguransa (MDS) no mos ba Parlamentu Nasional (PN) tanba lasatisfeitu ho promosaun diviza ne’ebe mak halo foin lalais ne’e. 

“Hau hanoin katak, lalika halo petisaun, kuandu la loos lori ba Tribunal ida ne’e mak diak hodi rejolve problema, petisaun ne’e dala ruma ema politiza fali bele sai problema, ne’ebe hau husu ba sira lori ba Tribunal para kastigu ka la kastigu depende Tribunal,” dehan Maijen Lere ba Jornalista sira iha Palacio Prezidenti Aitarak Laran, Dili (8/5) hafoin hasoru malu ho Prezidenti da Republika Taur Matan Ruak. 

Maijen Lere dehan, nuudar Maijor Jeneral F-FDTL nia lakohi hatama kanuru tohar ba PNTL nia uma laran, maibe nia so fo hanoin deit katak lalika halo petisaun tanba halo petisaun ema seluk bele aproveita sei aumenta tan problema. 

Antes ne’e, Primeiru Ministru (PM) Kay rala xanana Gusmao ne’ebe assume mos pasta nudar MDS deklara ona katak, membru PNTL balun ne’ebe mak halo petisaun ne’e nia konese sira ida-idak tanba ne’e Governu sei la halua kbiit ema ida-idak nian. Xefi do Governu ne’e dehan tan katak, ohin loron Governu halo sistema ne’ebe diak ba povu no joven katak sistema hodu lao tuir dalan no la lao arbiru. 

Nune’e mos Prezidneti promosaun extraordinaria PNTL, Isabel Ferreira hateten katak, sistema promosaun diviza ba PNTL rigrozu tebe-tebes, laos haree ba koor ka familia mak fo diviza lae, tanba simu desizaun ne’e responsablidade boot. 

Husi lamentasaun membru PNTL nian ne’e, Prezidenti promosaun Extraordinario PNTL, Isabel Ferreira husu ba membru PNTL ne’ebe mak la liu no sira ne’ebe mak normal atu labele preokupa ba deviza ka salariu, maibe tenki iha konfiansa nasional katak, membru PNTL tomak ne’ebe mak iha agora servi povu no nasaun. 

.