“PN Hasai Total Imunidade Borlaco”

.

Jornal Nacional Diario - Kuarta-Feira, 08 Maiu 2013 

Parlamentu Nasional (PN) hasai total imunidade Sekretariu Estadu Fortalesementu Institusional (SEFI), Francisco Soares Borlaco atu nune’e iha 28 Maiu mai nee ba hatan iha Tribunal ba kazu ne’ebe nia komete. Parlamentu Nasional hasai imunidade Francisco Borlaco iha Tersa (7/5) liu husi votasaun sekretu ne’ebe votus afavor 55, kontra 3 no abstensaun 2. 

Imunidade Francisco Borlaco nia ne’e Parlamentu Nasional hasai to’o desizaun final husi tribunal ba kazu nebe nia komete. Kazu ne’ebe Francisco Borlaco komete mak abuzu poder no fraude fiskal wainhira sei assume kargu nudar Diretor Jeral Ministeriu Finansas iha Kuartu Governu konstitusional. 

“Komesa primeiru julgamentu iha loron 28 de Maiu fulan ne’e to’o prosesu ne’e hotu mak sekretariu Estadu bainhira Tribunal fo sai katak, livre ka la livre,” haktuir Prezidenti Komisaun G Parlamentu Nasional Trata ba asuntu Etika Deputadu, Mateus de Jesus ba Jornal Nacional Diario, hafoin votasaun ba imunidade Borlaco nian. 

PN hasai imunidade tanba akuzasaun Tribunal hasoru Borlaco kadeia tinan 2 ba leten, tanba ne’e tuir lei tenki hasai imunidade hafoin bele ba hetan iha Tribunal. 

Antes ba votasaun ne’e iha pro kontra entre deputadu husi bloku no husi Bancada FRETILIN rasik, tanba parte bloku hakarak haree tan fila fali ka estuda klean maka hasai imunidade, maibe parte FRETILIN husu atu halo votasaun para hasai imunidade Borlaco ninian hodi ba hatan iha Tribunal. 

Tuir ajenda husi parte Tribunal Distrital Dili marka ona katak, iha loron 28 Maiu fulan ne’e nia laran Tribunal Distrital Dili sei halao primeiru julgamentu ba Borlaco. 

.