“PN Deskobre ADN Aprova Osan Siluman”

.

Jornal IndependenteTersa-Feira, 14 Maiu 2013 

Fiskalizasaun ne’ebe mak Parlamentu Nasional (PN) halo iha Distritu Covalima, identifika Ajensia Dezenvolvimentu Nasional (ADN) hasai osan siluman ba Projeitu Pakote Dezenvolvimentu Desentralizasaun (PDD) iha Distritu ne’e. Membru PN, Deputadu Manuel de Castro hateten, projetu pronjong ne’ebe hala’o iha Suku Tashilin, sub Distritu Zumalai, Distritu Covalima, ADN aprova hodi halo adisional ba projeitu PDD ne’ebe iha inisiu tinan 2012 ho total rihun U$85 sa’e ba rihun U$373. 

Tuir informasaun ne’ebe AND hato’o ona ba Parlamentu Nasional katak, husi total orsamentu hirak ne’e balun selu dezenu projeitu ne’e, maibe, PN la hetan informasaun klaru kona ba BOQ ba projeitu ne’e selu hira. 

La’os ne’e deit, membru PN sira mos identifika projeitu irigasaun ho distansia kuaze metru 80 iha Suai, ne’ebe ho orsamentu alokadu 2012 nian iha livru tres hamutuk rihun U$12, maibe ADN hasa’e ba rihun U$24, ikus mai rezultadu husi projeitu ne’e laiha tanaba aat fali ona. “Haree tok anju sira ne’e orsida hatun-hasa’e orsamentu ne’e oinsa,” hateten manuel, liu husi Plenaria iha uma fukun PN (13/5). 

Nune’e, nia husu ba komisaun Anti Korupsaun (KAK) atu halo investigasaun ba ADN no Ministeriu Kompotente, tanba halo adisional nonok deit la liu husi PN. “Ami husu ba KAK tenki ba investiga, tuir lei, ADN labele halo adisional ba PDD,” hateten Manuel. 

Nia konsidera ADN ultrapasa PN nia servisu, tuir nia ADN laos anju, tanba ne’e tenki investiga atu nune’ebe bele hatene lia los iha ne’ebe. Nune’e, Jornal Diario ne’e hala’o kontaktu ba Diretor ADN, Samuel Marcal, Via telefone maibe laiha fatin, tanba sei partisipa serimonia familia nian iha Distritu.

.