PM Xanana: “Krize 2006 Problema Sosial”

.

Jornal Nacional Diario - Kuarta-Feira, 15 Maiu 2013 

Primeiru Ministru (PM) Kay Rala Xanana Gusmao hateten katak, krize politika ne’ebe mosu iha tinan 2006 liu ba ne’e, tanba problema nasional, laos Polisia Nasional Timor Leste (PNTL ho FALINTIL-Forsa Defesa Timor Leste (F-FDTL) mak sai autor. 

Primeiru Ministru Xanana Gusmao kasu lia hirak ne’e bainhira halao divulgasaun munisipiu faze primeiru iha parte Leste, Distritu Viqueque, (14/5). 

“Desizaun ita foti no sai hanesan meus ida atu rezolve problema ne’ebe ke mosu iha ita nia rain, ema balun dehan autor prinsipal maka PNTL ho F-FDTL, maibe ita analiza didiak ida ne’e problema social, tanba benefisiu husi ukun an povu la senti,” hateten Xanana Gusmao. 

Ho ida ne’e xefe Governu husu ba ema hotu-hotu, atu halakon tiha kultura hanoin aat ida ne’e ba instituisaun estadu nian, PNTL no F-FDTL. “Laos F-FDTL no PNTL mak sai autor ba krize 2006, tanba ne’e mak presiza halakon tiha kultura aat sira ne’e,” Xefe Governu ne’e hateten ba Povu Viqueque. 

Tuir PM Xanana katak, desde 2002-2012, Orsamentu jeral Estadu sei gasta tuir nesesidade, maibe balun neebe uza la dun diak, husu ba ida-idak nia an rasik. Xanana mos husu ba povu tomak iha Distritu Viqueque, atu muda kultura no hanoin aat sira hodi muda mentalidade ba hasoru Kamara Munisipio. 

Xanana mos realsa katak, tempu agora la’os buka direitu deit, maibe tenki mos dever, se lae susar atu halo buat foun. Xefe Governu lerembra katak, povu mak harii estadu, liu husi fakar ran ba mate, no tama ba faze ukun rasik an atu dezenvolve povu nia moris diak, ne’ebe mak mensiona iha moro 2013 nian katak, “Hadia Uluk Uma Laran”. 

Xanana mos esplika tan katak, presiza halo tan revolusaun hodi muda ema hotu nia mentalidade hodi bele kontribui ba prosesu desentralizasaun ne’ebe lao dadaun. 

“Se-se de’it, se se deiiiit, bainhira 2002 kaer, maibe 2007 la konsege evita liu husi manifestasaun oi-oin, ita susar, ita lori hela kuda ida krekas ida ne’e, ita la iha be ida atu fo hemu, tanba ita la iha kuadru legal,” Xanana dehan. 

.