PM Xanana Gusmao: “TL Seidauk Tempu Atu Halo Miss Timor”

,

Jornal Nacional Diario - Segunda-Feira, 06 Maiu 2013 

Primeiru Ministru Kay Rala Xanana Gusmao sublina katak, seidauk to’o tempu ba Timor Leste (TL), atu halo Miss Timor, tanba sei iha programa perioridade barak ne’ebe mak Governu no Estadu presiza atu halo. 

“Agora ne’e ema barak mak preokupa ho Miss Timor, maibe Miss Timor ne’e seidauk bele hala’o iha Timor, Miss Munisipiu mak importante liu atu hala’o uluk iha rai ida ne’e, tanba nia kondisaun ba povu nia moris, iha area ekonomia, kultura, no social sei fraku tebes,” dehan PM Xanana Gusmao ba povu Distritu Ermera, sesta (03/5), iha dialogu divulgasaun Planu no programa Desentralizasaun Camara Municipio. 

Xefe Governu ne’e hatutan tan katak, maske ema balun lahatene saida mak atu halo iha Miss Timor ne’e, maibe sira apoiu Miss Timor ne’e, maske programa ida ne’e mos importante maibe seidauk bele halo. 

 PM Xanana salienta katak, tanba povu mak harii estadu, liu husi sira nia sakrifisiu, ho ida ne’e duni mak municipiu ne’e atu hadia hikas povu nia moris ne’ebe sakrifika ona barak ba nasaun ne’e nia independensia. 

“Miss iha Timor ne’e sei barak, Miss Administration, Miss coordination, Miss Understanding no sei iha Miss bar-barak tan,” katak Xanana Gusmao.

Xanana dehan tan, iha Timor ne’e sei iha Miss barak ne’ebe mak presiza hadia, atu nune’e Miss sira ne’e lakon husi Timor ne’e. 

“Atu Miss-Miss sira ne’e lakon husi Timor ne’e, presiza realiza uluk Miss Municipiu, tanba Miss Municipiu nee maka sei liberta povu sai husi mukit ba moris diak,” Xanana afirma. 

Xefi Governu ne’e mos husu ba Ermera-oan hotu atu prepara an didiak hodi simu Miss municipiu ne’e, mak sei lori sira ba moris diak futuru nian. 

Xanana mos husu ba povu Distritu Ermera tomak atu hadomi malu, tanba agora dadauk ne’e la’os tempu ona atu oho malu, maibe tempu atu fo liam ba malu hodi lori nasaun ida ne’e futuru ne’ebe diak. 

VIVA KAY RALA XANANA GUSMÃO!!!!!!!!!!!!!!!!!!!

.