PM Xanana Gusmao: “Miss Timor Planu Baruk Ten”

.

Jornal Timor Post - Segunda-feira, 06 Maiu 2013 

Primeiru Ministru Klarifika ba povu Distritu Ermera no Liquisa katak, planu Miss Timor ne’ebe Ministeriu Turizmu atu realiza iha tinan ida ne’e tama kategoria, planu baruk ten, tanba, atividade ne’e kontraversial ho infraestrutura Turizmu Baziku iha rai laran. 

“Keta fiar planu ne’ebe planeia husi Ministeriu Turizmu, tanba programa ne’e hanesan mehi derepenti, hau konsidera planu ne’e la’os integradu, tanba la hanoin didiak saida mak sei fo benefisiu husi Miss Timor ne’e,” Kay Rala Xanana Gusmao hateten lia ne’e, liu husi ninia dialogu ho komunidade sira, Sabadu (4/5) iha salaun Administrasaun, Gleno, Distritu Ermera. 

 Nia hatutan, kuandu planu ne’e atu harii metin iha Timor Leste, bainhira povu tomak kumpriende ona saida maka Miss Timor. “Seidauk to’o tempu ita nia rain atu harii Miss Timor, tanba ita hotu sei preokupa ba programa perioridade seluk atu implementa iha Timor Leste, laos Miss Timor,” nia tenik. Xanana rekonese, Planu Miss Timor seidauk ondis ho sosieades povu nian, Miss Munisipiu maka bele liberta kondisaun povu nian moris iha area ekonomia, kultura no social,” Xanana dehan. 

Esi lider rezistensia ne’e hatutan tan katak, povu maka harii estadu liu husi sira nia sakrifisiu, ne’e duni, munisipiu maka sei hadia hikas povu nia moris ne’ebe sakrifika ona iha nasaun ne’e nia independensia, la’os Preokupa fali ho Miss Timor. 

“Miss Timor ne’e barak, ita iha Miss administration, miss coordination, miss understanding, miss lazy ou miss baruk ten no sei iha miss barak tan,” Xanana haktuir. Prezidenti Partidu CNRT ne’e husu ba Ermera oan hotu atu prepara an didiak hodi simu Miss Munisipiu, tanba munisipiu mak sei lori esperensia ba futuru ne’ebe diak liu. 

 Nune’e, Miss Timor hanesan planu programa husi Ministeriu Turizmu ne’ebe xefia husi Francisco Kalbuadi Lay. 

VIVA XANANA GUSMÃO!!!

.