PM Xanana Gusmao: “Directores Hotu Tenki Hadomi Sasan Povu Nian”

,

Jornal Nacional Diario - Segunda-Feira, 06 Maiu 2013 

Primeiru Ministru (PM) Kay Rala Xanana Gusmao mos husu ba membru Governu hotu, liu-liu Diretor sira hotu iha Timor laran tomak atu hadomi sasan ne’ebe estadu fob a sira atu hala’o servisu, tanba sasan povu nian. 

 “Hau dehan ba imi Diretores hotu hadomi ba sasan ne’ebe estadu fo ba imi ne’e sasan povu nian,” hateten PM Kay Rala xanana Gusmao ba Povu Distritu Ermera, Sesta (03/5), iha dialogu divulgasaun planu no programa Desentralizasaun camara Municipio. 

Tuir Xanana, labele estadu foin entrega kareta ba imi, loron rua tolu aat fali ona, i hasai nafatin osan hodi lori ba bengkel (Ofisina), ida ne’e la’os servi diak. PM Xanana hatutan katak, labele gasta arbiru povu nia osan ne’ebe la tuir nia dalan, maibe tenki gasta povu nia osan ne’e ba nesesidade povu nian duni. Xanana akresenta tan katak, povu tau konfiansa ba Governu atu buka hatene povu nia problema ne’ebe sira infrenta hodi rezolve. 

“Laos atu uza oportundiade ne’e atu gasta no estraga povu nia sasan ba interese individu ka ema ida nian,” afirma xanana. PM Xanana mos husu ba Diretor sira iha Distritu ida-idak atu servi povu ho diak, atu povu mos bele sente benefisiu husi nasaun ida ne’e nia independensia. 

“La’os halo tiha uma ida, husu tan atu monta AC, AC iha tiha dehan TV laiha, hola tiha TV dehan kareta atu halo viazen ba distritu laiha, hola tiha pajero ida fob a, loron rua tolu ba para fali iha Bengkel,” katak xefe Governu ne’e. Xanana Gusmao mos informa liu tan katak, agora dadaun ne’e tempo atu hamutuk hodi hanoin saida mak problema, saida mak dadaun ne’e povu infrenta, tanba munisipiu ne’e atu liberta povu husi mukti ba moris diak.

 “Tanba ita uluk seidauk independensia, ita dehan buka atu kaer rasik ita nia kuda talin, agora independensia ona ita tenki intrega fali kuda talin ne’e ba povu, atu povu kaer rasik sira nia kuda talin,” Xanana Gusmao afirma. 

Xanana Gusmao dehan tan katak, tempu ona Timoroan hotu hamriik atu servisu hodi tebe sai buat ne’ebe mak durante sira infrenta iha sira moris, tanba munisipiu Governu atu entrega poder ba sira atu dezenvolve rasik sira nia Distritu. 

.