PM Xanana Apoiu “Eventu Miss Timor Sei Realiza Duni”

.

Jornal Nacional Diario - Kinta-Feira, 09 Maiu 2013 

Ministru Turizmu no Cultura (MTC), Francisco Calbuadi Lay hateten Primeiru Ministru konkorda ona Miss Timor, tan ne’e MTC sei koalia ho grupo ne’ebe pro no kontra ba iventu ne’e atu oinsa eventu ne’e bele lao ho susesu. 

Razaun Ministru Turizmu no Cultura, Francisco Kalbuadi Lay, atu halo diskusaun ho grupo hirak refere atu fo hanoin ba malu, rona malu, komprinede malu, intende malu, oinsa mak programa ne’e bele lao ho susesu. 

Ministru Turizmu (MT), Francisco Kalbuadi Lai hateten, ho polimika ne’ebe mak oras ne’e mosu iha publiku konaba aktividade Miss Timor nian hodi hamosu grupo pro no kontra, ne’e normal, tanba assume kna’ar hanesan mebru governu sempre hasoru problema hirak nune’e, importante mak tenki rona mos opiniaun ema hotu nian. 

“Horesik (horibainruak) hau esplika ba membru Parlamentu Nasional husi Komisaun D katak, orsamentu U$200.000 ne’e aprova ona husi parlamentu, maibe agora hanesan membru governu hein deit ba ezekuta. 

Mas komo agora aktividade Miss Timor ne’e sai tiha polemika oituan mak hau sei haree tempu ida atu tur hamutuk ho gurpu rua ne’e hotu, ida ne’ebe mak pro no kontra hodi deskute no buka solusaun diak para halao buat sira ne’e ba interese nasional nian,” hateten Ministru Turismu ba Jornalista sira, Kuarta (08/5), iha FFTL House, Kampo Demokrasia, Dili. Ministru Turismu ne’e hatutan, kona ba programa Miss Timor ne’e mos,,nia parte ba hasoru malu ona Primeiru Ministru Xanana Gusmao oinsa bele fo nia apoiu, no PM Xanana rasik apoiu no konkorda tebes atu implementa Programa Miss Timor ne’e. 

“Hau konfirma dala ida tan ba PM Xanana no PM xanana apoiu aktividade ida ne’e, tanba se tinan-tinan ita gasta osan barak ba atividade expozisaun iha rai liur sira ne’e, nusa mak aktividade iha rai laran ne’e labele halao fali, ne’ebe hau nuudar nia staff, hau respeita xefe do Governu wainhira fo instrusaun ida mai hau, ne’e hanesan lian maromak ida nian ne’ebe hau tenki halo tuir,” Francisco Lay akresenta. 

Aktividade Miss Timor ne’ebe mak Ministerio Turizmu planeia ona ne’e, tuir orariu ne’ebe mak estabelese, sei halao iha loron 24 fulan Maiu ne’e.

.