“Oknum PNTL Halakon Kilat Hatan Ona Iha Tribunal”

.

Jornal Timor Post - Kuarta-feira, 22 Maiu 2013 

Komandante Jeral Polisia Nasional Timor Leste (PNTL) esklarese, oknum PNTL ne’ebe halakon kilat prosesa ona iha Ministeriu Publiku (MP), aleinde ne’e, PNTL mos halo ona demisaun. 

“Prosesu ba iha oknum ne’e kontinua lao hela iha Ministeriu Publiku, nunee mos oknum ne’e rasik komando PNTL foti medidas halo ona prosesu demisaun,” dehan Komisariu Longunhos Monteiro ba Jornalista sira iha Kuartel jeral PNTL Kaikoli, Dili. 

 “Durante ne’e oknum ne’e hala’o kna’ar ho diak tebes, so ke ninia sala mak laiha responsabldiade ba kilat ne’ebe mak durante ne’e nia kaer hodi halo seguransa ba nasaun. 

Nia hatutan, prosesu demisaun tuir lei no orden seguransa ninian, kundu membru ida ka rua maka laiha responsablidade ba armas ne’ebe mak halo seguransa ba ema hotu no nasaun, hatudu sentidu lakon de responsablidade. Tanba ne’e, nia dehan, liu husi prosesu investigasaun, komando foti desizaun hodi halo demisaun. 

“Dala barak ita nia membru deputadu sira kestiaona beibeik kona ba kestaun ne’e, maibe ita nia deputadu sira ne’e mos la kohi hakat mai iha komando jeral ne’e para hodi buka hatene kona ba prosesu sira hanesan ne’e,” dehan nia. 

Monteiro afirma, komandi nunka atu hapara prosesu sira hanesan ne’e, tanba oknum polisia ida mak halakon kilat, ida ne’e halo komando mos lakon konfiansa. “prosesu ba kazu kilat lakon ne’e, ninia prosesu kontinua ona iha MP nia liman, mas oknum ida ne’e mos simu duni prosesu ida ne’e, tanba nia rekonese duni responsavel ne’ebe mak nia rasik halo e komando mos sei buka tuir hela ema ne’ebe mak foti kilat ida ne’e,” katak nia. 

Tuir Longuinhos, bainhira hatene ona ema ne’ebe mak naok kilat, nia mos sei prosesu tuir lei ne’ebe mak iha, tanba prosesu ba ema naok no ema foti la hanesan, tanba kilat ne’e hanesan sasan ne’ebe mak PNTL sira uza hodi halo seguransa ba nasaun. 

.