“MP Hatama Rekursu Kontra Gil Alves”

.

Jornal Nacional Diario - Sesta-Feira, 17 Maiu 2013 

Ministeriu Publiku (MP) hatama ona rekursu ba Tribunal Rekursu (TR) hodi kontra desizaun Primeiru instansia Tribunal Distrital Dili (TDD) hodi fo absolve ba Gil da Costa Alves. Iha loron 25 Abril, foin lalais ne’e, TR simu ona rekursu MP nian ho numeru Prosesu 36/CO/2013/TR. 

”Rekursu ne’e sei iha juis prosesu nia liman hodi estuda rekursu ne’e no iha tempu badak nia laran TR sei hasai desizaun ba rekursu ne’e,” informa fontes TR nian ba jornalista iha TR, Kinta (16/5). 

Eis Ministru Turizmu, Comersiu no Industria (MTCI) Gil da Costa Alves ho Henrique Carlos ne’ebe hanesan finansas iha partidu ASDT versaun Gil Alves hetan akuzasaun husi MP katak foti osan no haloka osan Partidu ASDT versaun Joao Correia ne’ebe hetan rekunhesementu egal husi Tribunal Rekursu. Aktu Gil Alves ho Henrique Carlos ne’e MP akuza sira komete krime burla agravado, pekulato agravado no abuzu konfiansa . 

Maibe, iha desizaun ikus liu husi leitura akordaun ne’ebe lee sai husi Juis Jose Maria de Araujo, absolve Gil Alves ho Henrique Carlos husi krime hotu, tanba konsidera iha loron 28 Maiu 2012, Tribunal Rekursu fo sai desizaun katak, ASDT versaun Joao Correia nian mak legal ka manan. Iha leitura akordaun ne’e mos esklarese, iha loron 29 no 30 Maiu, Gil Alves ho Henrique Carlos halo levantamentu foti osan partidu ASDT ninian iha Banku Nasional Ultramarinu (BNU). 

 Gil Alves ho Henrique Carlos iha Direitu, tanba desizaun tranzitu em julgadu husi Tribunal rekursu foin sai iha loron 4 Junhu 2012, ne’ebe mantein nafatin ho desizaun antes nian katak ASDT versaun Joao Correia mak legal i ASDT Versaun Gil Alves illegal ka lakon. 

TDD mos konsidera krime pakulato agravadu ne’ebe MP akuza ba Gil Alves ho Henrique Carlos ne’e la priense rekezitus, tanba bainhira Gil Alves ho Henrique Carlos hala’o aktividade partidu nian, sira nia funsaun laos hanesan funsionariu publiku no sira mos laos uza osan estadu ka halo lakon osan estado, maibe sira uza osan organizasaun nian ka osan ne’ebe partensia ba partidu ida nian ho krime abuzu konfiansa mos Tribunal konsidera la aprovadu. 

Ho desizaun husi TDD ne’ebe konsidera akuzasaun husi MP la dun iha faktu forte no absolve Gil Alves, MP ne’ebe iha altura ne’e reprejenta husi prokurador Jose Ximenes atual prokurador Jeral Republika la satisfeitu, tanba ne’e iha loron 15 Abril 2013, MP hatama ona rekursu hodi kontra desizaun TDD nian.

.