MP Arkiva Keixa Lucia Lobato “Kazu Ne’e Komplikadu”

,

Jornal Nacional Diario - Segunda-feira, 13 Maiu 2013 

Ministeriu Publiku (MP), daudaun ne’e, arkiva ona keixa husi prizioneira Lucia Lobatu nian ne’ebe hatama iha Marcu 2013. 

Prizioneira Lucia Lobato ho nia advogadu Jose Pedro Camoes, hatama keixa ba MP hodi prosesa Juiz nain tolu ne’ebe deskonfia involve iha prosesu desizaun habeas Corpus (tahanan illegal). 

Iha desizaun Ministeriu Publiku nian ne’e mos akuza prizioneira Lucia Lobato ho krime denunsia kalunioza no konsidera provas ne’ebe aprezenta husi ekipa advogadu Lucia Lobatu nian la sufisiente no hafoer ema seluk nia fama ou naran. 

Advogadu Lucia Lobato nian, Jose Pedro Camoes hateten, maske MP arkiva ona keixa ne’e, maibe sira hatama ona karta protesta hasoru arkuivamentu MP nian hodi husu investigasaun. 

“Ami hatama karta protesta tanba razaun husi prokurador ne’ebe halo investigasaun katak, nia rona ona parte sira ne’ebe advogadu Lucia Lobato alega katak, juiz no politikus balun hatudu mal komportamentu iha sira nia servisu ba foti desizaun iha Tribunal de Rekursu, maibe MP nunka bolu ema vitima ne’ebe hatama keixa hodi rona mos sira nia deklarasaun,” esplika Jose Pedro Camoes ba Jornalista sira iha Tribunal Distrital Dili (TDD), sesta (10/5). 

Nia esplika katak, hafoin sira aprejenta keixa ba MP, maibe to’o ikus mai MP hare katak, laiha evidensia hatudu luis sira halo komportamentu la diak iha sira nia knar, MP bele uza baze legal ne’ebe publika ona no hanesan evidensia atu akuza hikas vitima ne’ebe hatam keixa, Pedro camoes esplika katak, desizaun arkivamentu ne’ebe advogadu simu iha segunda foin lalais, ne’ebe iha loron ne’e mos Lucia Lobato mai halo tratamentu iha Hospital Nasional Guido valadares (HNGV). 

“Ami dubidas mak MP ne’ebe reprezenta vitima le deit surat ida sein rona deklarasaun husi ema sira ne’ebe hato’o keixa, ba ida ne’e komu MP la rona deklarasaun husi Juiza Juvilada Margarida veloso no Lucia LObato maka ami sente arkivamentu ne’e la dun loos,” afirma Jose Pedro Camoes. 

Jose Pedro camoes, aprofunda katak, sira hato’o karta protesta tanba haree desizaun arkivamentu iha nulidade balun ne’ebe la tuir lei artigu 229 kodigu prosesu penal. NUne’e, husi parte seluk,Judisial Sistem Monitorin Programe (JSMP) konsidera kazu prizioneira Lucia Lobato nian ne’e kumplikadu oituan, tanba ne’e mak JSMP sujere atu kria ekipa independenti ida mak ahlo inbvestigasaun ba alegasaun husi advogadu Lucia Lobato nian kontra Juiz sira nian komportamentu. 

Diretor JSMP, Luis Oliveira Sampaio, fo hanoin katak, wainhira ekipa investigasaun independenti konsidera alegasaun hirak ne’e iha baze, evidensia ruma iha karik so Tribunal mak bele halo la’os MP, mesmu alegasaun ne’e hasoru Tribunal. 

“Pergunta mak, tanba sa MP tenki halo arkivamentu, se prosesu refere la involve ema independenti id abele duvida ho faktus ne’ebe produs husi alegasaun,” hateten Luis Sampaio. 

Nia dehan tan katak,” Ita seidauk rona rejultadu, mas derepenti alega tan ho krime denunsia kalunioza, ne’e ita hare bele konflitu interese entre Tribunal ho MP.” 

.