“MP Akuza Hikas Lucia Lobato”

.

Jornal Independente - Kinta-Feira, 09 Maiu 2013 

Ministeriu Publiku (MP) tenki uza fali lei kodiku penal artigu 285 kona ba denunsia kalonioza (pncemaran nama baik) hasoru prizioneira eis Ministra Justisa Lucia Lobato, tanba keixa ne’ebe ekipa advogado Lucia Lobato hato’o ba MP laiha evidensia. 

Ministeriu Publiku arkiva ona keixa ne’ebe ekipa advogadu Lucia hato’o ba MP ne’ebe deskonfia involvimentu Juizes Tribunal rekursu balun no Deputadu Aniceto Guterres iha desizaun ba kazu Habeas Corpus nian. Ekipa Advogado, Jose Pedro Camoes hateten, nia simu tiha ona prosesu arkivamentu husi Ministeriu Publiku iha loron segunda, 06/5 foin lalais ne’e ho nia kontiudu arkivamentu. 

“Ami la dun kontenti ho arkivamentu ne’e tanba iha buat balun lao la loos,” hateten Jose Camoes. Prosesu inisiu hasoru nia kliente Lucia Lobato liu husi faktus Short Message Service (sms). 

Ne’e, kazu ne’ebe involve juizes balun iha desizaun ba kazu habeas corpus ho faktus korespondensia via e-mail. Maibe, ami nia kazu ne’ebe hatama kona ba korespondensia e-mail, depois Ministeriu Publiku arkiva tiha ho rajaun la klaru, ida ne’e ami senti hanesan injustisa ida,” nia hateten. 

Nia hatutan, dokumentu ne’ebe kompostu husi pajina 20 resin, iha pajina ikus Ministeriu Publiku relata katak sei halo denunsia kalonioza hasoru Lucia Lobato no Juiz Margarida Veloso. Juiza Margarida Velosa nu’udar esi juiza internasional iha Tribunal Rekursu. 

“Ami la hatene kona ba prosesu ida ne’e, uluk ami mak halo keixa ba Ministeriu Publiku, ikus mai Ministeriu Publiku atu halo fali denunsia kalonioza hasoru fali ami nia kliente,” nia hateten. 

Parte advogadu sei halo esforsu kona ba prosesu arkivamentu ne’e, no mos pronto atu ajuda kliente Lucia Lobato wainhira ba presta deklarasaun iha Tribunal kona ba kazu denusnia kalonioza. 

Aliende ne’e, Tribunal Distritu Dili (TDD) mos to’o oras ne’e seidauk simu keixa husi Prezidente Tribunal Rekursu Claudio Ximenes hosi hasoru deputadu FRETILIN, Aniceto Guterres. 

Juiz Administrador Tribunal Dili, Duarte Tilman hatete, to’o oras ne’e nia seidauk simu keixa ida husi Claudio Ximenes. 

.