“Ministru, Trava Uituan Vizita Rai Liur”

.

Jornal Independente - Tersa-Feira, 14 Maiu 2013 

Deputadu husi bancada Partidu Demokratiku (PD) no FRETILIN preokupa ho membru governu sira ne’ebe halo viazen beibeik ba rai liur. Xefe Bancada PD Maria M’Bessa hateten, viazen membru Governu sira ba rai liur ne’e importante maibe tenki sukat oituan, tanba buat barak mak sei halo iha rai laran. 

 Deputadu ne’e dehan, presiza halo limitasaun ba membru Governu sira atu labele ba beibeik rai liur. “SE bele karik atu ba rai liur tenke iha informasaun ne’ebe mak klean liu tan atu nune’e ema hotu bele kumpriende nia viazen ba rai liur ne’e kona-ba asuntu importante estadu nian,” katak nia iha PN (13/5). 

Nia informa, nia parte bolu ona Ministru Negosiu Estranjeiru atu esklarese kestaun balun, maibe seidauk konsege tanba Ministru ne’e sei sai ba rai liur. 

Nia hateten, nia parte kestiona viazen ne’e tanba laos implika deit ba gastus orsamentu estadu, maibe servisu ne’ebe mak presiza halo iha rai laran tenki paradu tanba sei hein Ministru fila husi rai liur. Iha fatin hanesan, 

Deputadu Bancada FRETILIN Francisco Miranda Branco hateten, dezlokasaun membru governu sira ba rai liur halo sir abele abandona servisu importante iha rai laran. 

“Ami atu bolu Ministru, Vice Ministru sira laiha hotu de’it tanba ida hanesan orgaun fiskalizasaun ba lalaok governu nian ami lamenta tebes ho Ministeriu sira nia audensia iha sira nia servisu Ministeriu nian,” hateten deputadu FRETILIN ne’e. nia hatutan, PN preokupa tebes karakter Ministru sira nian ne’ebe halao servisu iha rai liur barak liu fali iha rai laran. 

Branco dehan, atu hamenus gastu ba viazen diak liu Ministru sira uza deit klase ekonomia duke uza klase VIP. 

Maski nune’e, nia dehan, viazen ba rai liur ne’e kompetensia Xefe governu nian atu desidi no PN fo deit ninia hanoin. 

.