Membru PN kestiaona “Projeitu Laiha Kualidade Maske Pagamentu 100%”

.

Jornal Nacional Diario - Sesta-Feira, 10 Maiu 2013 

Deputadu Osorio Florindo husi Bancada FRETILIN nu’udar mos membru komisaun E ne’ebe trata asuntu infraestrutura Transporte Komunikasaun hala’o fiskalizasaun iha psotu military Sub Distritu Tilomar la’o la diak tamba kompania ne’ebe mak kaer projeitu konstrusaun ne’e laiha kualidade maske remata tiha ona no pagamentu tiha ona 100%. 

Deputadu ne’e esplika katak, nia lamenta tebes tanba iha administrasaun esplika hotu ba komisaun E katak, Projeitu konstrusaun fiziku hotu-hotu 100% ona, maibe realidade barak mak laiha kualidade, pior liu balun foin 65% maibe dehan 100% ona no selu tan hotu ona. 

Deputadu ne’e dehan, konstrusaun ne’e lao rungu ranga laiha kualidade, maibe remata tiha ona hodi entrega ona ba Sekretariu Estadu Defesa (SED), nune’e F-FDTL sira lakohi hela, tanba odamatan la diak, kuak ba kuak mai, be no eletrsidade laiha, parede sira fera fali ona, lantai mos fera hotu ona, nune’e sira ejiji hala’o konstrusaun foun fila fali. 

Nune’e, Deputada Albina Marcal husi bancada CNRT nuudar mos membru komisaun E informa katak, kondisaun ne’e la serve duni ba F-FDTL atu hela ba, tanba F-FDTL laos sivil maibe military ne’ebe mak atu halao seguransa ba nasuan ida ne’e. 

“Hau aban bain rua sei ba to’o iha Dili, hau sei telefone directamente ba komandante Jeral F-FDTL hodi haree ba kestaun ne’e, tamba ne’e, halao seguransa patroila iha Fronteira laos hanesan iha kapital Dili laran, hodi lao deit,” hateten Albina ho triste. 

Albina Marcal mos sita katak, orsamentu ne’ebe mak aloka ba konstrusaun Postu Militar Tilomar ne’e tama iha Orsamentu jeral Estadu husi Sekretariu Estadu Defeza nian ho montante U$200,843.89, maibe halo ho kualidade laiha. 

 “Odamatan husi uma ne’e sai kuak fali ona, lantai ho parde mos fera hotu ona, konstrusaun postu militar ne’e kaer husi kompania Fredi Unipesoal Lda, maibe la ho kualidade, F-FDTL lakohi hela odi ezei ba SED halo fali foun,” nia dehan. 

,