MARI ALKATIRI AKONSELHA KANSELA EVENTU "MISS TIMOR"

.

Mari Alkatiri - Facebook

Hau dok hela husi Timor-Leste. Maibe'e tanba IT hau mos bele akompanya nafatin debate balu be la'o dadauk iha ita nia rai. Hau lolos atu husik nafatin debate ida ne'e la'o tan ba oin. 

Buat balu halo hau atu tama iha topiku ida ne'e agora kedas tanba hau hare'e katak debate ida ne'e la'o hela maibe'e seidauk ema ida identifika lolos ida nebe'e maka sai husar ba topiku ida nebe'e sai importanti tebes ba ema balu. Topiku ne'e maka Miss Timor. Hau husu:

1. Razaun sa'ida maka lori fali Ministerio Turismu atu sai fali promotor ba konkursu Miss Timor (Timor-Leste karik?).
2. Objetivu sa'ida atu hetan husi konkursu ida ne'e?
3. Sa preparasaun no formasaun maka halo tiha ona atu lori ba konkursu ida ne?
4. Sa kriterios maka defini tiha ona no se maka defini?

Tuir hau nia hatene buat sira ne'e atu hala'o ho kriterios balu nebe diskriminatorio tebes, bele duni kontra konstituisaun RDTL nian.

Akompanya debate ne'e halo hau atu koalia tuir sa'ida maka hau hanoin.

Tendensia bot dehan deit Timor seidauk preparado. Balu dehan fali ita tenki defende dignidade feto timor nian. Ne'e hotu los.

Maibe'e halo nusa maka ita atu prepara no atu defende diak liu dignidade feto Timor nian? Ida ne'e hau seidauk rona.

Hau mos hakarak husu tanba sa ida ne'e sai prioridade ba Ministerio Turismo? Ne'e Miss Timor ka Miss Turismo? Sasan hotu2 sai rungu- ranga demais. Bainhira los maka ita atu bele aprende halo sasan tuir dalan ida ke los?

Maluk sira. Feto Timor, hanesa feto hotu2 presiza uluk atu bele tama iha prosesu tomak dezenvolvimento sosial, kultural, ekonomiku, politiku ho direitu no deveres tomak hanesa sidadaun hotu2.

Bainhira ita iha feto profisional ida ke diak, bainhira iha artista idake diak, bainhira ita iha desportista ida diak, ita hotu tenki ho orgullu foti nia as liu tanba nia representa ho dignidade ita nia nasaun, ita nia povu. Representa la os deit tanba nia kompetensia iha area ida2 maibe'e tanba nia mos konyese diak liu nia direito no deveres, historia nia rai nian no istoria mundo nian. Representa diak liu Timor-Leste tanba bele defende diak liu tan direito Rai doben Timor-Leste iha mundo rai klaran.

Miss Timor (Timor-Leste) aban bainrua mos tenki sai "embaixadora" ida atu defende no representa ho dignidade ita nia Rai Timor-Leste. La os deit para atu dada turista mai Timor-Leste. Liliu atu hatudu ba Mundo saida maka ita nia kultura no halo nusa maka ita simu no hakuak kultura povu seluk nian.

Hanoin hanesa ne'e hau bele dehan katak Timor-Leste sei presiza halo preparasaun ida ke naruk, antes atu hanoin ba Miss Timor.

Hau nia konsellu ba organizadores sira atu kansela inisiativa ida ne'e.

Abrasu