“Makina Teste Ran Avaria”

.

Jornal Timor Post - Kinta-Feira, 02 Maiu 2013 

Makina filtrus teste ran iha laboratoriu Hospital Refral Baucau (HRB) avaria durante fulan rua ona, situasaun ne’e, difikulta servisu ekipa tekniku laboratoriu hodi halo analiza Kimia ran ba kazu emerjensia. 

Diretor HRB Alberto Guterres hatutan, situasaun ne’e difikulta tebes atu atende pasiente ne’ebe presija urjente, entaun, pasiente ne’ebe presiza desloka ba Hospital nasional Dili hosi halo analisis ba ran antes halo operasaun. 

 “Hau hato’o ona ba nasional, liu-liu ba aviaun ne’ebe mak ajuda karik iha kazu emerjensia ruma hanesan asidenti ou buat ruma ne’ebe importante atu atende lalais, tanba dala barak familia pasiente sira mai protesta fali ami,” Alberto informa ba Jornalista Timor Post hafoin komemora loron mundial ba trabaldores iha HRB, Kuarta (1/5). 

 Nia hatutan, makina filtrus ne’ebe hasai ran patologia kimikal no mos ba hemotologia report ne’e avaria hotu besik fulan rua ona. Agora atu hasai ran hanesan dengue, malaria ne’e bele, maibe moras seluk atu halo operasaun susar tanba labele, nomos susar atu atende kazu emerjensia ruma. 

Alende makina, HRB mos infrenta falta aimoruk tanba, aimoruk kuazen item 21 falta, situasaun ne’e mos difikulta prosesu tratamentu ba pasiente sira ne’ebe presiza hetan tulun orjente. 

Tuir observasaun Diariu ne’e nota katak, kondisaun Hospital mos lafavorese ba pasiente sira atu halo tratamentu, tanba hariis fatin barak mak la funsiona no dois hodi afeita tan moris oioin ba pasiente sira.

,