“Luron Ninin Fatin Ba Ema Kiak”

.

Jornal Independente - Tersa-Feira, 14 Maiu 2013 

Iha Timor Leste realidade ida ne’e mosu iha ita nia oin, dala ruma konsege tuku ita fuan, dala barak mos sikat leet deit, lakonsege kaer ita nia sentimentu, iha sidade kiik ne’e, loro-loron labarik lubuk ida mosu iha ita nia oin, ho sira nia jeitu no lalaok rasik, la hatene karik ita nia matan mak ema lohi ka ita nia fuan mak la konsege sente hodi husik liu de’it realidade ne’e. 

Iha fatin-fatin publiku, hahu husi Jardin Lecidere, Kolmera, to’o merkadu sira iha sidade laran, labarik kiik barak mak loro-loron leba hela ai-fuan, lori hela manu tolun, modo tahan hodi fa’an. Maske nune’e, nain ulun sira sempre dehan labarik sira mak futuru nasaun nian, oinsa futuru nasaun ne’ebe bele sai diak bainhira ukun nain sira la preokupa ho sira nia edukasaun? 

Se los mak atu preokupa no se los mak atu tau matan? Inan-aman, komunidade, ka governu, ou se loss?.

Deolindo Lukas (12) ne’ebe loro-loron fa’an manu tolun dalan, dehan, nia la eskola tanba laiha osan atu sosa nesesidade eskola nian. “hau sai eskola tanba osan laiha atu sosa farda ou lapizeira, no atu husu ba mama maibe osan laiha, tanba ne’e mak hau sai eskola hodi fa’an manu tolun de’it,” dehan Deolindo iha Farol Segunda feira (13/5). 

Nia dehan, kondisaun ekonomia familia ne’ebe fraku sai mos hanesan razaun ida tama iha vida negosiu. Nune’e mos, Jaime Seko (14) ne’ebe inan aman mate ona hateten, nia desidi atu buka rasik osan, tanba nia tiun laiha kapasidade atu dudu nia ba eskola. 

“Hau la eskola tanba inan aman laiha, no hau hela deit ho tiun, tiun mos iha oan barak entaun hau tenki buka osan rasik atu sosa hau nia presija,” dehan Seko. 

Nune’e, nia husu ba Governu atu tau matan ba oan kiak sira hanesan nia no kolega sira seluk, nune’e sira mos bele hetan futuru ne’ebe diak hanesan ukun nain sira nia oan.

Nota: Meus queridos irmãos,  um dia Deus vai dar de volta tudo o que é vosso e vocês merecem, um dia... A esperança é a última que morre. Tenham fé e muita coragem. 

.