Lucia Lobato Tensaun As “Evakua Mai HNGV”

.

Jornal Nacional Diario - Tersa, 07 Maiu 2013

Prizioneira Lucia Maria Brandao Freitas LObato, Segunda (6/5), evakua urjenti mai Hospital Nacional Guido valadares tanba sofre tensaun as.

Lucia Lobato ne’ebe akompania husi Guarda Prizaun Gleno nain hat (4) ho kareta Prizaun Celula to’o iha HNGV tuku 14:40 Otl, hodi tama liu bas ala emerjensia no hetan kedas atendementu husi mediku no pessoal saude sira.

 Lucia Lobato nia kaben Americo Lopes ho nia oan nain tolu (mane 2 feto 1), inklui prima nain rua mos akompania hotu Lucia Lobato, ne’ebe derepenti deit evakua mai HNGV hodi halo tratamentu. Margarida nu’udar pesoal de saude iha prizaun Gleno ne’ebe akompania mos Lucia Lobato mai HNGV, informa katak, iha Kinta liu ba, Prizioneira Lucia Lobato sofre ona tensaun, nune’e, ekipa mediku sira lori kedas ba klinika Ermera hodi hetan pedidu tenki lori mai HNGV, Dili.

“Momentu ne’eba ami koko Lucia Lobato nia tensaun 150 plus 90,” informa Margarida de sena ba Jornalista iha HNGV. Wainhira prizioneira Lucia Lobato to’o iha sala Emerjensia HNGV, pesoal saude sira halo kedas observasaun. Iha fatin hanesan, Advogadu privadu Lucia Lobato nian, Jose Pedro camoes, informa katak, nia parte la dun apar hatene didiak, moras saida mak afeita ba nia klientes, tanba ne’e maka tenki evakua mai HNGV atu bele observa no identifika Lucia nia sofrementu ida ne’e.

“Ami hatene deit mak nia moras antigu nian, maibe, mediku maka bele fo relatoriu diak no halo rekomendasaun ba tratamentu ida ne’ebe mak efetivu liu atu rekopera Lucia nia kondisaun saude,” esplika Jose Pedro Camoes.

Oportunidade ne’e, Jose Pedro camoes mos esklarese katak, sira nia parte hein hela deiszaun husi Tribunal Rekursu kona ba rekursu extraordinariu ho ‘habeas corpus (tahanan illegal)’ ne’ebe maka hatama nanis ona iha fulan Marsu liu ba.

“Ami espera katak, desizaun bele mai lalais para agaranti ba diretu Lucia Lobato nian,” hateten Jose Pedro camoes. Iha fulan hirak liu ba mos, autoridade sira iha prizaun Gleno halo evakuasaun urjenti Lucia Lobato mai iha HNGV hodi halo jeneral Check-Up ba nia kondisaun saude, liu-liu ba moras pulmaun ne’ebe nia sofre.

.