Lucia Lobato: “Mafia Justisa Iha TR Daet Ba MP”

.

Jornal Nacional Diario - Kuarta-Feira, 15 Maiu 2013 

Prizioneira Lucia Maria Brandao Freitas Lobato, konsidera aktu mafia justisa ne’ebe mosu iha Tribunal Rekursu (TR) komesa da’et to’o ona iha Ministeriu Publiku (MP). 

Lucia hateten lia hirak ne’e hodi halo reasaun hasoru desizaun MP nian ne’ebe arkiva tiha ona, nia keixa hasoru juiz nasional nain ida, internasional ida ho membru Parlamentu Nasional ida, ne’ebe akuza ‘futu lia’ iha prosesu habeas corpus ne’ebe la iha razaun fundamentu. 

“Hau hakarak hateten katak, agora ne’e mafia justica la’os iha deit Tribunal, maibe da’et ona ba MP, derepenti deit taka hikas hau nia keixa hasoru juiz internasional nain rua, nasionais ida ho deputadu ida ne’ebe involve desizaun habeas corpus ne’e,” afirma Lucia Lobato ba jornalista iha HNGV, Tersa (14/5). 

 Lucia Lobato sente hakfodak tanba prosesu ne’ebe nia hatama iha semana rua nia laran deit hetan kedas desizaun husi MP hodi arkiva lalais iha deit keixa ne’e ho razaun ne’ebe la fundamentu. “Tuir despaixu husi Adjuntu Prokurador Geral Republika, Zelia Trindade katak, provas ne’ebe ami aprezenta ne’e la sufisiente atu halo akuzasaun hasoru juiz sira ne’e no mos deutadu ne’e, ida ne’e it abele dehan katak, MP tenta salva mafiozu sira ne’ebe tur iha TR,” afirma Lucia Lobato. 

Lucia konsidera MP halo diskriminasaun ba nia, tanba iha keixa ne’e MP rona deit juiz internasional rua, nasional ida no mos deputadu, maibe MP sira la rona Juiza Margarida Veloso no mos nia rasik hanesan vitima. Prezidenti TR Claudio Ximenes, tuir Lucia Lobato, la rona funsionariu sira iha TR oinsa mak sira fahe prosesu ne’e ba juiz sira i la rona mos konsellu Superior Majistratura Judisial (KSMJ) oinsa renova kontratu juiz sira ne’e. Lucia Lobato mos konsidera hahalok MP ne’e hanesan tristeza boot ida ba Timor sira neebe mak buka justica no bele hamonu kredibilidade TR ho MP nian. Tuir Lucia Lobato, MP fraku halo investigasaun ba keixa ne’e ou MP mak sengaja duni atu taka tiha prosesu ne’e, tanba bainhira prosesu ne’e lao ba oin, se dada sira hotu ne’ebe involve prosesu foti desizaun Habeas Corpus. 

“Hau hanoin katak Timoroan sira hotu tenki kondena hahalok grupo mafiozu sira ne’ebe hakarak sai tiha nain ba ita nia sistema judicial hodi atinji sira nia interese rasik, tanba se ida ne’e mak ita la fokit abuut aat no la oho kedas, tribunal ne’e ba oin sei ba hotu rai kuak, tanba grupu mafiozu sira ne’e mak manda tiha sistema judicial Timor nian,” hateten Lucia Lobato. 

 Lucia iha email barak kona ba juiz iha TR ne’ebe haruka ba malu, maibe tanba MP la bolu Juiz Margarida Veloso no mos nia rasik, nune’e sira labele fo sai ba publiku, tanba durante ne’e sira hein MP bolu no halo investigasaun mak sira foin loke hotu ba Tribunal no ba publiku hotu haree. Konaba akuzasaun husi MP nian hasoru Lucia Lobato ho krime denunsia kalunioza, ho hamnasa Lucia dehan, nia pronto ba fo deklarasaun iha MP bainhira MP bolu nia. 

.