Lucia Duvida Ho HNGV “Husu Halo Operasaun Iha Singapura”

.

Jornal Nacional Diario - Kuarta-Feira, 15 Maiu 2013

Ho kondisaun no atendimentu ne’ebe mukit no ‘sabraut’ iha Hospital Nasional Guido valadares (HNGV) halo prizioneira Lucia Lobato duvidas boot, tanba ne’e, Lucia sujere atu transfere nia ba halo tratamentu no operasaun iha Singapura.

Iha segunda ne’e, Guarda Prizionais ho mediku prizionais Gleno, halo evuasaun orjenti prizioneira Lucia Lobato mai HNGV, tanba sofre tensaun alto (aas) no afetadu mos ho moras seluk ne’ebe tenke halo operasaun.

Atu bele garante salvasaun ba Lucia nia vida husi moras hirak ne’e, segunda ne’e, akipa Advogado Lucia Lobato nian hatama ona karta ida ba Tribunal hodi husu autorizasaun atu halo operasaun iha Hospital Mounht Elisabeth Singapura. Lucia Lobato ba Jornalista sira iha HNGV, TErsa (14/5) informa katak, nia mos halo ona kontaktu ho mediku sira ne’ebe uluk halo operasaun ba nia iha Singapura atu bele konfirma ho mediku Timor nian, atu bele aprezenta dadus analiza mediku nian kona ba moras ne’ebe afeta ba nia.

Lucia esklarese katak, mesmu nia estatutu nudar prizioneira illegal, maibe nia hein nafatin desizaun husi Tribunal atu bele autoriza nia ba halo tratamentu iha Singapura. “SE Tribunal la autoriza hau, mak hau pronto halo operasaun deit iha HNGV,” hateten Lucia Lobato.

Iha tinan 2010, Lucia LObato halo ona operasaun dala rua iha Hospital Mounht Elizabeth Singapura sobre moras ne’ebe afeta ba nia saude, no tuir lolos fulan-fulan Lucia tenki ba kontrola mediku iha Singapura, maibe to’o tinan ida ona nia nunka sama ain iha Singapura tanba tenki kumpri no obdese desizaun ‘habeas corpus (tahanan illegal) husi Tribunal. Lucia mensiona katak, nia lakohi halo operasaun iha HNGV no hakarak atu ba halo operasaun iha Singapura ne’e laos dehan atu sai ba rai liur, maibe tanba kondisaun HNGV mak la premiti atu halo operasaun.

“Ita hotu hatene katak, ekipamentus iha HNGV ne’e sufisiente tebes, aimoruk mos laiha, iha fulan hirak ne’e ita rona HNGV la iha kondisaun ne’ebe diak, tanba ne’e mak hau lakohi atu halo operasaun iha HNGV,” hateten Lucia Lobato.

Oras ne’e dadaun, Lucia Lobato nia tensaun komesa normal ona husi 120 pro 80 no Lucia moa tenki hemu aimoruk lor-loron para atu bele normaliza fali nia tensaun ne’e.

.