Lu-Olo: “5 Maiu Loron Lian Portugueza No Ba Kultura CPLP”

.

Jornal Nacional Diario - Segunda-Feira, 06 Maiu 2013 

Prezidenti partidu FRETILIN, nu’udar mos eis Prezidenti ba Parlamentu Nasional Republika Demokratika Timor-Leste nian, nomos ba Asembleia Konstituante entre 2001-2002, Dr. Francisco Guterres Lu-Olo ohin hasa’e rai maun-alin sira ne’ebe ho lian hanesan, lian Portugueza, maun-alin ho bin alin sira iha komunidade paizes ho lian Portugueza ne’ebe Timor-Leste mos halo parte, tan loron importante ohin nia, loeon 5 Maiu, ne’ebe sai nu’udar ‘ loron lian Portugueza no Kultura CPLP nian’. 

“Loron 5 Maiu hetan marka nu’udar loron ba lian Portugueza no ba kultura CPLP nian”, husi konsellu Ministru ba Komunidade dos paises de Lingua Portuguesa (CPLP), iha Sorumutuk Ordinaria XIV, halao iha loron 20 fulan Jullu tinan 2009, iha sidade praia, Cabo Verde,” hateten Francisco Guterres ‘Lu-Olo’ liu husi nota komunikadu imprensa ne’ebe redasaun Jornal Nacional Diario hetan asesu iha Domigo (5/5). 

Lu-Olo hateten katak, lian mak fator prinsipal no identidade povu nian. “Tan ne’e, loron ne’ebe mak komemora Lian komum entre Estadu-Membru CPLP na’in 8 Lian Portugueza, lian mak fator prinsipal ida ba povu sira nia identidade, Lian Portugueza halo-parte ba identidade, ba istoria no ba kultura komum ba paiz 8, inklui mos Timor-Leste,” dehan Lu-Olo. 

 Tuir Lu-Olo, lian portugueza halibur hamutuk ho estadu 8 iha komunidade ida, CPLP, ho ema liu tokon atus rua mak kaer Portugues hanesan sira nia lian, parte ida ba sira nian identifikasaun. 

“Ita iha orgulhu hola parte ba komunidade ida ne’e, Lian Portugueza, ita nia lian ofisial ida, ema iha kontinente 4 mak koalia, ema tokon ba tokon, ohin loron lian ne’ebe make ma barak liu koalia iha Emisfeiru-sul, nomos nia sai ona lian servisu iha organizasaun internasional oi-oin, ema uza lian ne’e iha forum internasional bar-barak, ohin loron lian Portugueza hetan mos komemorasaun husi UNESCO,” Hatutan Lu-Olo ex-komondante iha luta armada durante tinan 24 iha ai laran ne’e. 

Lu-Olo hatutan tan katak, iha sorumutu Konsellu Ministru CPLP iha loron 29 Jullu 2009, rekomenda mos ba estadu membru CPLP nian atu halo komemorasaun loron lian portugueza, atu bele haburas ninia afirmasaun iha Estadu membru sira no iha komunidade Internasional. 

“Ita Timor oan sira, opta iha ita nia konstituisaun joven lian Portuguesa nu’udar lian ofisial ida, ita moos tur iha prosesu harii CLP nia laran, bainhira hati’i Instituto Internacional da Lingua Portuguesa (IILP), ita konkorda ho akordo Ortografico foun ida, hodi bele armozia ita-nian lian, ita repete fila fali importansia atu defende lian Portugueza, iha Simeira hotu-hotu CPLP nian, nomos iha sorumutu Konsellu Ministru no Ministrus Edukasaun no ba kultura CPLP nian, ho benefisiu mai ho ida ne’e, ita iha dignidade sai membru komunidade paizes CPLP,” Deklara Lu-Olo. 

Tuir Lu-Olo, iha Pais sira CPLP nian sei bele no hakarak katak, lian Portuguesa sei hametin tan no hamutuk ho harmonia ho lian nasional sira seluk, ne’ebe hariku ita nia sosieade sira, defende lian portugueza no buat ne’ebe komum ba ita hotu laos katak, atu desrespeita ka halua tiha saida mak ita nia rasik. 

“Nune’e bele hatudu de’it rekonesementu ne’ebe mak ita iha ba malu, ba diversidade kultura ita nian rain sira nian, lian Portugueza, tan lian komum, nia mak iha karik liu, fator ba ita-nia diversidade cultural, maibe nia mos mak pontu ne’ebe ita nia identidade istorika hasoru malu,” katak Lu-Olo. 

“Timor Leste mak membru joven liu iha familia CPLP nian, ita nia konstituisaun tau lian portugueza, sori-sorin ho tetun, nu’udar lian ofisial iha Timor Leste,” Dr. Lu-Olo hatutan. Lu-Olo afirma, iha tinan 2014 Timor-Leste sei kaer Prezidenti CPLP nian, sei Onra Boot ida ba Timor Leste. 

 “Maibe dezafiu boot ida mos ba ita, ita iha obrigasaun atu halo barak no diak liu tan ba promosaun no defeza ba lian portugueza, tanba ita nia labarik sira nia edukasaun no atu hametin ita nia identidade depende ba esforsu hirak ne’e, esforsu hirak ne’e sei importante tebes ba produsaun matenek tekniku no sientifiku no hodi bele fahe lisuk iha nivel internasional, sei importante ba projesaun ita nia lian no ita nia komunidade (CPLP) iha mundu,” Dr. Lu-Olo dehan nu’udar lia menon ba Estadu Timorense atu bele fo liu tan atensaun didiak ba loron ida ne’e, sei lori diak mai Timor Leste no ba rai maun alin sira iha CPLP. 

.